ഉത്തരാഖണ്ഡിലെ തെഹ്രി ഗഢ്വാൾ ജില്ലയിൽ യാത്രാബസ് കൊക്കയിലേക്ക് മറിഞ്ഞ് എട്ട് പേർ മരിച്ചു. 26 പേർക്ക് പരിക്കേറ്റു. ചൊവ്വാഴ്ച പുലർച്ചെ ഗുലാർ ബസാറിന് സമീപം ഗുലാർ പാലത്തിൽനിന്ന് ഏകദേശം 100 മീറ്റർ താഴ്ചയിലുള്ള മലയിടുക്കിലേക്കാണ് ബസ് പതിച്ചത്. ഹരിദ്വാറിൽനിന്ന് ബദരീനാഥ് ഭാഗത്തേക്ക് പോവുകയായിരുന്ന ബസിൽ അപകടസമയത്ത് 30 മുതൽ 35 വരെ യാത്രക്കാരുണ്ടായിരുന്നുവെന്നാണ് പ്രാഥമിക വിവരം. ഏഴ് പേർ സംഭവസ്ഥലത്തുതന്നെ മരിച്ചു. ഗുരുതരമായി പരിക്കേറ്റ ഒരാൾ ഋഷികേശ് എയിംസിൽ ചികിത്സയ്ക്കിടെയും മരണപ്പെട്ടു. അപകടവിവരമറിഞ്ഞ് സംസ്ഥാന ദുരന്തനിവാരണ സേനയും പോലീസും പ്രാദേശിക രക്ഷാപ്രവർത്തകരും സ്ഥലത്തെത്തി രക്ഷാപ്രവർത്തനം ആരംഭിച്ചു. ദുർഘടമായ പ്രദേശത്തുനിന്ന് പരിക്കേറ്റവരെ സ്ട്രെച്ചറുകളിൽ റോഡിലെത്തിച്ചാണ് ആശുപത്രികളിലേക്ക് മാറ്റിയത്.
അപകടത്തിൽ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. ജീവൻ നഷ്ടപ്പെട്ടവരുടെ കുടുംബങ്ങളുടെ ദുഃഖത്തിൽ പങ്കുചേരുന്നതായും പരിക്കേറ്റവർ വേഗത്തിൽ സുഖം പ്രാപിക്കട്ടെയെന്നും അദ്ദേഹം ആശംസിച്ചു. തെഹ്രി ജില്ലാ മജിസ്ട്രേറ്റ് നിതിക ഖണ്ഡേൽവാളും സീനിയർ പോലീസ് സൂപ്രണ്ട് ശ്വേത ചൗബെയും അപകടസ്ഥലത്തെത്തി രക്ഷാപ്രവർത്തനങ്ങൾക്ക് നേതൃത്വം നൽകി. പരിക്കേറ്റവരെ ഋഷികേശിലെ എയിംസിലും സർക്കാർ ആശുപത്രിയിലുമാണ് പ്രവേശിപ്പിച്ചിരിക്കുന്നത്.

