തിരുവനന്തപുരം: കോവിഡ് 19 മാര്ഗനിര്ദേശങ്ങള് കാറ്റില്പ്പറത്തി അഞ്ച് ജില്ലകളില് കള്ളുഷാപ്പ് ലേലം. കണ്ണൂര്, മലപ്പുറം, എറണാകുളം, ആലപ്പുഴ, തിരുവനന്തപുരം ജില്ലാ കളക്ട്രേറ്റുകളിലാണ് ലേലം നടക്കുന്നത്. ഉദ്യോഗസ്ഥര് ഉള്പ്പെടെ നൂറിലേറെ പേരാണ് ലേലത്തില് പങ്കെടുക്കാനെത്തിയത്.
കോവിഡ് വ്യാപനം തടയുന്നതിന്റെ ഭാഗമായി പൊതുപരിപാടികളും ആള്ക്കൂട്ടങ്ങളും പാടില്ലെന്നു നിര്ദേശം നല്കിയിരുന്നു. ഇവ ലംഘിച്ചായിരുന്നു ലേലം. സംഭവമറിഞ്ഞ് സ്ഥലത്തേക്ക് മാധ്യമങ്ങള് എത്തിയതോടെ എറണാകുളത്തെ ലേലം അധികൃതര് മാറ്റിവച്ചു.
കണ്ണൂരിലെ ലേലഹാളിലും പ്രതിഷേധമുണ്ടായിരുന്നു. ഇവിടേക്ക് യൂത്ത് കോണ്ഗ്രസ് പ്രതിഷേധവുമായി എത്തുകയായിരുന്നു. ഇതോടെ കണ്ണൂരിലും അധികൃതര് ലേലം നിര്ത്തിവച്ചു.
ബിവറേജ് മദ്യശാലകള് തുറന്നു പ്രവര്ത്തിക്കുന്ന സാഹചര്യത്തിലാണ് കളക്ടറേറ്റില് തന്നെ കള്ളുഷാപ്പ് ലേലവും നടക്കുന്നത്. വേണ്ടത്ര ജാഗ്രതാ മുന്കരുതലോടെയാണ് ലേലം എന്നാണ് എക്സൈസ് അധികൃതരുടെ വാദം.

