ദില്ലി: കൊവിഡ് പ്രതിരോധ പ്രവര്‍ത്തകര്‍ക്ക് ആദരം അര്‍പ്പിക്കാന്‍ സേനയുടെ ഫ്ലൈപാസ്റ്റ് ഇന്ന്. ശ്രീനഗര്‍ മുതല്‍ തിരുവനന്തപുരം വരെ വ്യോമസേനയുടെ വിമാനങ്ങള്‍ പറക്കും. കൊവിഡ് ആശുപത്രികള്‍ക്കുമേല്‍ പൂക്കള്‍ വിതറും.
കശ്‌മീര്‍ മുതല്‍ കന്യാകുമാരി വരെ രാജ്യത്തിന്റെ ഓരോ കോണിലും മൂന്നു സേനകളും പ്രത്യേകം പരിപാടികള്‍ നടത്തും. ഇതിന്റെ ഭാഗമായി ഇന്നു ശ്രീനഗര്‍ മുതല്‍ തിരുവനന്തപുരം വരെയും കച്ച്‌ മുതല്‍ ദിബ്രുഗഡ്‌ വരേയും വ്യോമസേന ഫ്‌ളൈ പാസ്‌റ്റ്‌ നടത്തും. വിവിധ കമാന്‍ഡുകളില്‍നിന്നും സുഖോയ്‌ 30 അടക്കമുള്ള യുദ്ധവിമാനങ്ങള്‍ ഇതില്‍ പങ്കുചേരും.
വൈകിട്ട്‌ നാവികസേനയുടെ യുദ്ധക്കപ്പലുകള്‍ തീരങ്ങളില്‍ നങ്കൂരമിട്ട്‌ വിളക്ക്‌ തെളിച്ച്‌ ആദരം അര്‍പ്പിക്കുമെന്നും നാവിക ഹെലികോപ്‌ടറുകള്‍ ആശുപത്രികള്‍ക്കു മുകളില്‍ പുഷ്‌പവൃഷ്‌ടി നടത്തുമെന്നും നാവികനാ വൃത്തങ്ങള്‍ അറിയിച്ചു.
രാവിലെ 10-നും 11-നും ഇടയ്‌ക്കാണ്‌ വ്യോമസേനയുടെ ആകാശ സല്യൂട്ട്‌. കേരളത്തില്‍ തിരവനന്തപുരത്തും കൊച്ചിയിലുമാണ്‌ സൈന്യത്തിന്റെ പ്രകടനം. തിരുവനന്തപുരത്ത്‌ ദക്ഷിണ കമാന്‍ഡില്‍നിന്ന്‌ സുഖോയ്‌ 30 അടക്കമുള്ളവ ആകാശത്ത്‌ അണിനിരക്കും. നഗരത്തിലെ രണ്ടു പ്രമുഖ ആശുപത്രികള്‍ക്കു മുകളില്‍ വ്യോമസേനാ ഹെലികോപ്‌ടറുകള്‍ പുഷ്‌വൃഷ്‌ടി നടത്തുമെന്നും സൈനിക വൃത്തങ്ങള്‍ അറിയിച്ചു.
