ഓർമക്കുറവ്, കാഴ്ച നഷ്ടം, മതിഭ്രമം, അസാധാരണമായ ചലനങ്ങൾ തുടങ്ങിയ നാഡീവ്യൂഹ പ്രശ്നങ്ങളിലേക്ക് നയിക്കുന്ന വിചിത്രമായ ഒരു രോഗം കാനഡയിൽ പടരുന്നതായി റിപ്പോർട്ട്. തലച്ചോറിനെ ബാധിക്കുന്ന ഈ രോഗം കാനഡയിലെ ന്യൂ ബ്രൺസ്വിക് പ്രവിശ്യയിലാണ് ആശങ്കപരത്തുന്നത്. ന്യൂയോർക്ക് പോസ്റ്റ് ആണ് റിപ്പോർട്ട് പുറത്തുവിട്ടത്. 2015ലാണ് ഇത്തരം കേസുകൾ ആദ്യം കണ്ടെത്തിയത്. എന്നാൽ, കഴിഞ്ഞ ഒരു വർഷത്തിൽ ഈ വിചിത്ര രോഗം ബാധിച്ച 147 രോഗികളുടെ കേസുകൾ ശ്രദ്ധയിൽപ്പെട്ടതായാണ് ഡോക്ടർമാർ പറയുന്നത്. ചെറുപ്പക്കാരെയാണ് ഈ രോഗം ബാധിച്ച് കാണുന്നതെന്നാണ് വിദഗ്ധർ പറയുന്നത്. 17നും 80നും ഇടയിൽ പ്രായമായവരാണ് രോഗബാധിതർ.
വീടുകളിലും കൃഷിയിടങ്ങളിലും ഉപയോഗിച്ച് വരുന്ന ഗ്ലോഫോസേറ്റ് എന്ന ഒരു കളനാശിനിയാണോ ഈ വിചിത്ര രോഗത്തിന് പിന്നിലെന്നാണ് സംശയിക്കുന്നത്. രോഗികളുടെ ലാബ് ഫലങ്ങളിൽ ഗ്ലൈഫോസേറ്റ് സാന്നിധ്യം കണ്ടെത്തിയതായാണ് ഡോക്ടർമാർ പറയുന്നത്. ജലസ്രോതസ്സുകളിൽ ഉള്ള ബ്ലൂ-ഗ്രീൻ ആൻഗെകൾ മൂലമുണ്ടാകുന്ന മലിനീകരണമാകാം രോഗകാരണമെന്നും കരുതപ്പെടുന്നു. ഈ ആൽഗെകളുടെ വളർച്ചയ്ക്ക് സഹായിക്കുന്ന കളനാശിനിയാണ് ഗ്ലൈഫോസേറ്റ്.