കുളിക്കാനും തുണി അലക്കാനുമുളള വെള്ളം കുഴിയിലുണ്ട്! കേരളത്തിലെ കുഴിറോഡിൽ കുളിച്ച് വ്യത്യസ്തമായ പ്രതിഷേധവുമായി യുവാവ് രംഗത്ത്

മലപ്പുറം : കേരളത്തിലെ റോഡുകളിൽ കുഴികളായതോടുകൂടി വ്യത്യസ്തമായ പ്രതിഷേധവുമായി യുവാവ് രംഗത്ത്. റോഡിലെ കുഴിയിൽ കെട്ടിക്കിടക്കുന്ന വെള്ളത്തിൽ കുളിച്ചും തുണി കഴുകിയുമാണ് യുവാവ് പ്രതിഷേധം അറിയിച്ചത്. മലപ്പുറം പാണ്ടിക്കാട് റോഡിലാണ് സംഭവം.

സർക്കാരിനെതിരെ പ്രതിഷേധവുമായി രംഗത്ത് എത്തിയത് ഹംസ എന്ന യുവാവാണ്. കേരളത്തിലെ മുഴുവൻ റോഡുകളുടെയും അവസ്ഥ ഇതാണെന്ന് യുവാവ് പറയുന്നു. പാണ്ടിക്കാട് നിന്നും പാലക്കാട് പോകുന്ന റോഡുകളിൽ എവിടെ നോക്കിയാലും കുഴിയാണ്. മൂന്ന് മാസം മുൻപ് വഴിവളെല്ലാം റീ-ടാറിംഗ് നടത്തിയാണ്. എന്നാൽ വീണ്ടും കുഴികൾ രൂപപ്പെട്ടു.

ഇത് എങ്ങനെ വ്യത്യസ്തമായി ജനശ്രദ്ധയിൽ പെടുത്താമെന്ന് ചിന്തിച്ചപ്പോഴാണ് ഇറങ്ങി കുളിക്കാം എന്ന ആശയം തോന്നിയത്. അങ്ങനെ റോഡിലെ കുഴിയിലുള്ള വെള്ളത്തിൽ കുളിക്കുമ്പോഴാണ് സ്ഥലം എംഎൽഎ യുഎ ലത്തീഫ് ഇതുവഴി കടന്നുപോയത് എന്നും യുവാവ് വ്യക്തമാക്കി.

കുളിക്കാനും തുണി അലക്കാനുമുളള വെള്ളം കുഴിയിലുണ്ട്. ഇവിടെ അപകടങ്ങളും മരണങ്ങളും നിരവധിയാണ്. ഇതൊന്നും അധികാരികൾ പോലും ശ്രദ്ധിക്കാത്തത് കൊണ്ട് പ്രതിഷേധം നടത്തിയത് എന്നും ഹംസ കൂട്ടിച്ചേർത്തു.