കോട്ടയം: കോട്ടയത്ത് (Kottayam) സ്വകാര്യ ബസും കാറും കൂട്ടിയിടിച്ച് ദാരുണാന്ത്യം. തിങ്കളാഴ്ച വൈകിട്ട് നാലരമണിയോടെയാണ് അപകടമുണ്ടായത്. മുട്ടമ്പലം കാഞ്ഞിരക്കാട്ടിൽ ശ്രീജിത്ത് (34), സേലത്ത് സ്ഥിരതാമസക്കാരനായ കോതനല്ലൂർ സ്വദേശി പുരുഷോത്തമൻ (64) എന്നിവരാണ് മരിച്ചത്.
നാല് പേരാണ് അപകടത്തില്പ്പെട്ട കാറിലുണ്ടായിരുന്നത്. രണ്ട് പേര്ക്ക് പരിക്കേറ്റു. കോട്ടയത്തേക്ക് വന്ന കാറും കോട്ടയത്തുനിന്ന് ചുങ്കപ്പാറയിലേക്ക് വരികയായിരുന്ന ബസും തമ്മിലാണ് കൂട്ടിയിടിച്ചത്. മറ്റൊരു വാഹനത്തെ മറികടക്കാന് ശ്രമിക്കുന്നതിനിടെ കാര് എതിരേ വന്ന ബസുമായി കൂട്ടിയടിക്കുകയായിരുന്നെന്ന് പ്രദേശവാസികള് പറയുന്നു. അപകടത്തില് പൂര്ണമായും തകര്ന്ന കാര് വെട്ടിപൊളിച്ചാണ് യാത്രക്കാരെ നാട്ടുകാര് പുറത്തെടുത്തത്. പരിക്കേറ്റവരെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചു.

