ദില്ലി: അഗ്നിപഥ് പദ്ധതിയുമായി ഒരടി പിന്നോട്ടില്ല. കേന്ദ്ര സർക്കാർ ഇന്ന് കരസേനയിലെ കരട് വിജ്ഞാപനം പുറത്തിറക്കും. വ്യോമസേന കരട് വിജ്ഞാപനം വെള്ളിയാഴ്ചയും നാവികസേന ശനിയാഴ്ചയും കരട് വിജ്ഞാപനം പുറത്തിറക്കുമെന്ന് പ്രതിരോധ മന്ത്രാലയം വ്യക്തമാക്കിയിരുന്നു. റിക്രൂട്ട്മെന്റ് റാലി ഓഗസ്റ്റ് പകുതിയോടെ നടക്കുമെന്നാണ് സൈനികകാര്യവകുപ്പ് അഡീഷണൽ സെക്രട്ടറി ലഫ്റ്റനന്റ് ജനറൽ അനിൽ പുരി അറിയിച്ചിട്ടുള്ളത്. കരസേനയിൽ ഡിസംബർ ആദ്യവാരവും ഫെബ്രുവരി 23നുമായി രണ്ടു ബാച്ചുകളിലായി പരിശീലനം തുടങ്ങാനാണ് തീരുമാനം.
അതേസമയം ഇന്ന് ഉദ്യോഗാർത്ഥികളുടെ വിവിധ സംഘടനകള് പ്രഖ്യാപിച്ച ഭാരത് ബന്ദ് ഉത്തരേന്ത്യയിൽ നടക്കും. പ്രതിഷേധ പ്രഹസനങ്ങൾ ഉത്തരേന്ത്യൻ സംസ്ഥാനങ്ങളിൽ അതിശക്തമാകാനുള്ള സാധ്യതയാണുള്ളത്. പ്രതിഷേധം രൂക്ഷമാകാനുള്ള സാധ്യത കണക്കിലെടുത്ത് ഹരിയാന, ഉത്തർ പ്രദേശ്, ബിഹാര്, പഞ്ചാബ് എന്നീ സംസ്ഥാനങ്ങളില് സുരക്ഷ ശക്തമാക്കി.
സംസ്ഥാന പോലീസിനും റെയില്വ പോലീസിനും ബിഹാറില് സർക്കാർ ജാഗ്രത നിര്ദേശം നല്കി. കൂടാതെ റെയില്വെ സ്റ്റേഷനുകള്ക്ക് കാവല് വർധിപ്പിച്ചുണ്ട്. യുപിയില് ഗൗതം ബുദ്ധ നഗറില് നിരോധനാജ്ഞ പ്രഖ്യാപിച്ചു. അക്രമം നടത്തുന്നവർക്കെതിരെ കര്ശന നടപടിയെന്ന് പോലീസ് അറിയിച്ചിട്ടുണ്ട്.