റിയാദ് : 2 ഗോളിനു പിന്നിൽ നിന്ന ശേഷം 3 ഗോൾ തിരിച്ചടിച്ച് മത്സരം സ്വന്തമാക്കി ക്രിസ്റ്റിയാനോ റൊണാൾഡോ നയിക്കുന്ന അൽ നസർ . ടീമിന്റെ വിജയഗോളടിച്ചതും നായകൻ തന്നെയാണ്. ഇതോടെ ലീഗിൽ ടീമിന്റെ കിരീട പ്രതീക്ഷകളും സജീവമായി.
അൽ ഷബാബിനെതിരെ 3–2നായിരുന്നു അൽ നസ്റിന്റെ വിജയം. ക്രിസ്റ്റ്യൻ ഗുവാൻകയുടെ ഇരട്ടഗോളിൽ ആദ്യം വലകുലുക്കിയത് അൽ ഷബാബാണ്. എന്നാൽ, ബ്രസീൽ താരം ആൻഡേഴ്സൻ ടാലിസ്ക അൽ നസ്റിനായി ആദ്യ ഗോൾ നേടി. രണ്ടാം പകുതിയിൽ അബ്ദുൽ റഹ്മാൻ ഗരീബിന്റെ ഗോളിൽ അൽ നസ്ർ സമനില പിടിച്ചത്.
തൊട്ടുപിന്നാലെയായിരുന്നു ക്രിസ്റ്റിയാനോ ഗോൾ കണ്ടെത്തി ടീമിനെ വിജയത്തിലെത്തിച്ചത്. 2 ഡിഫൻഡർമാരെ മറികടന്ന് മുന്നേറിയാണ് താരം പന്ത് വലയിലെത്തിച്ചത്. ലീഗിൽ താരത്തിന്റെ 14–ാം ഗോളാണിത്. ഈ കളിയിൽ, അൽ നസ്ർ പരാജയപ്പെട്ടിരുന്നെങ്കിൽ ലീഗിൽ നിലവിലെ ഒന്നാം സ്ഥാനക്കാരായ അൽ ഇത്തിഹാദ് കിരീടം നേടുമായിരുന്നു. അൽ ബാറ്റിനെ 1–0ന് തോൽപിച്ച അൽ ഇത്തിഹാദിനു നിലവിൽ 3 പോയിന്റ് ലീഡുണ്ട്.