മലപ്പുറം: പോപ്പുലർഫ്രണ്ട് റാലിയിൽ വിദ്വേഷം പ്രചരിപ്പിക്കുന്ന രീതിയിലുള്ള മുദ്രാവാക്യം വിളിച്ച കേസിൽ പ്രധാനികളെ തേടി അന്വേഷണ സംഘം മലപ്പുറത്ത്. റാലി സംഘടിപ്പിച്ചതിലെ ചില പ്രധാന പ്പെട്ടയാളുകളും മുദ്രാവാക്യം ഏറ്റുവിളിച്ചവരും മലപ്പുറത്തുണ്ടെന്ന് ലഭിച്ച വിവരത്തിന്റെ അടിസ്ഥാനത്തിലാണ് ആലപ്പുഴയിൽ നിന്നുള്ള പോലീസ് സംഘം മലപ്പുറത്ത് എത്തിയത്.
ആലപ്പുഴയിൽ പോപ്പുലർ ഫ്രണ്ടിന്റെ റാലിയിൽ ഉയർന്ന വിദ്വേഷമുളവാക്കുന്ന തരത്തിലുള്ള മുദ്രാവാക്യവുമായി ബന്ധപ്പെട്ട് സംസ്ഥാന നേതാക്കൾ അടക്കം 31 പേരുടെ അറസ്റ്റാണ് ഇതു വരെ പോലീസ് രേഖപ്പെടുത്തിയത്. കേന്ദ്ര ഏജൻസികളും വിഷയത്തെ ഗൗരവത്തോടെ വീക്ഷിക്കുന്നു. അതിനാൽ തന്നെ വരും ദിവസങ്ങളിൽ കൂടുതൽ അറസ്റ്റ് ഉണ്ടായേക്കുമെന്നാണ് ലഭിക്കുന്ന വിവരം.
നിലവിൽ ആലപ്പുഴയിൽ നിന്നും ഒരു ഉന്നത പോലീസ് ഉദ്യോഗസ്ഥന്റെ നേതൃത്വത്തിൽ പോലീസ് സംഘം മലപ്പുറത്ത് ക്യാമ്പ് ചെയ്ത് പരിശോധനകൾ നടത്തി വരികയാണ്. ചിലരെ കസ്റ്റഡിയിൽ ചോദ്യം ചെയ്ത ശേഷം നിരപരാധികളെന്ന് കണ്ട് വിട്ടയച്ചു. അതേസമയം, കേസിൽ കൂടുതൽ പേർ കസ്റ്റഡിയിലാകുമെന്നാണ് സൂചന.
