കോഴിക്കോട്: പ്രമുഖ മോഡലുകളുടെ അപകടമരണത്തെ തുടർന്ന് വിവാദമായ കൊച്ചിയിലെ നമ്പര് 18 ഹോട്ടലില് പെണ്കുട്ടികളെ ലൈംഗികമായി ചൂഷണം ചെയ്തെന്ന കേസില് പുതിയ ആരോപണങ്ങളും വിശദീകരണവുമായി പ്രതി അഞ്ജലി റീമാദേവ്. തനിക്കെതിരെയുള്ളത് കള്ളക്കേസാണെന്നും പരാതി വ്യാജമാണെന്നും അഞ്ജലി പറയുന്നു. നമ്പര് 18 ഹോട്ടലുടമ റോയി വയലാട്ടിനെ അഞ്ചുവര്ഷമായി അറിയാമെന്നും അഞ്ജലി പറയുന്നു.
“സാമൂഹികമാധ്യമങ്ങളിലും മാധ്യമങ്ങളിലും ഞാന് വ്യക്തിഹത്യ ചെയ്യപ്പെടുകയാണ്. കോടതിയുടെ പരിഗണനയിലുള്ള കേസായതിനാല് പലകാര്യങ്ങളും എനിക്ക് വെളിപ്പെടുത്താന് കഴിയില്ല. പരാതിക്കാരിക്ക് ക്രിമിനല് പശ്ചാത്തലമുണ്ട്. 18 വയസ്സ് തികയാത്ത സ്വന്തം മകളുമായി ഈ സ്ത്രീ പല ബാറിലും പോയിട്ടുണ്ട്. എന്റെ കൂടെയും വന്നിട്ടുണ്ട്. സൈജുവും ഞാനും ചേര്ന്നുള്ള പേഴ്സണല് ട്രിപ്പിലേക്ക് ഈ കുട്ടിയെയും മറ്റ് പെണ്കുട്ടികളെയും കൂട്ടി ഇവര് തന്നെ സ്വമേധയാ വന്നതാണ്. അതിന് പിന്നില് കള്ളക്കേസ് എടുക്കാനുള്ള ഗൂഢാലോചന നടന്നിട്ടുണ്ടെന്നും എന്നെ കുടുക്കാന് വേണ്ടിയാണ് ഇതൊക്കെ ചെയ്തതെന്നും എനിക്ക് വ്യക്തമായിട്ടുണ്ട്. റോയി വയലാട്ടിനെ അറിയില്ലെന്ന് ഞാന് എവിടെയും പറഞ്ഞിട്ടില്ല, നമ്പര് 18 ഹോട്ടലിന്റെ ഉടമയെന്ന നിലയില് എനിക്ക് അദ്ദേഹത്തെ അഞ്ച് വര്ഷമായി അറിയാം. ഞാന് മുമ്പും അവിടെ പോയിട്ടുണ്ട്. പക്ഷേ, രണ്ടുവര്ഷമായി ഞാന് കൊച്ചിയിലേക്ക് തന്നെ പോയിട്ടില്ല. അതിന് മുമ്പേയായാലും റോയിയുമായി വ്യക്തിപരമായ ബന്ധമില്ല. എന്നാല് സാമൂഹികമാധ്യമങ്ങളില് കെട്ടിച്ചമയ്ക്കുന്നത് ഓരോ കഥകളാണ്” – അഞ്ജലി പറയുന്നു.
