റിയാദ്: സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിന് നേരെ വീണ്ടും ആക്രമണശ്രമം. ലക്ഷ്യസ്ഥാനത്തേക്ക് കുതിച്ചെത്തിയ ക്രൂസ് മിസൈല്‍ അറബ് സഖ്യസേന ആകാശത്തുവെച്ച് വിജയകരമായി തകര്‍ത്തു. എന്നാല്‍, ആക്രമണത്തെത്തുടര്‍ന്ന് വിമാനത്താവളത്തിലെ പ്രധാന ടെര്‍മിനലുകളിലൊന്നായ നാലാം നമ്പര്‍ ടെര്‍മിനലില്‍ തീപിടിത്തമുണ്ടായതായി സഖ്യസേന സ്ഥിരീകരിച്ചു. തീയണയ്ക്കാനുള്ള ശ്രമങ്ങള്‍ പുരോഗമിക്കുകയാണ്.
കഴിഞ്ഞദിവസം വിമാനത്താവളത്തിന് നേരെയുണ്ടായ കനത്ത ആക്രമണത്തില്‍ 11 ഇന്ത്യക്കാര്‍ക്ക് പരിക്കേറ്റിരുന്നു. ഇവരുടെ വിശദാംശങ്ങള്‍ ശേഖരിച്ചുവരികയാണെന്ന് റിയാദിലെ ഇന്ത്യന്‍ എംബസി അറിയിച്ചു. ലോകത്തെത്തന്നെ നടുക്കിയ ഈ ആക്രമണത്തില്‍ ആകെ 12 പേര്‍ കൊല്ലപ്പെടുകയും 309 പേര്‍ക്ക് പരിക്കേല്‍ക്കുകയും ചെയ്തു. 2015 മേയിനുശേഷം സൗദി അറേബ്യ നേരിടുന്ന ഏറ്റവും വലിയ ആക്രമണമാണിതെന്നാണ് വിലയിരുത്തപ്പെടുന്നത്.
തുടര്‍ച്ചയായ ആക്രമണങ്ങളെത്തുടര്‍ന്ന് റിയാദിലേക്കുള്ള വിമാന സര്‍വീസുകള്‍ പൂര്‍ണ്ണമായി തടസ്സപ്പെടുകയും വിമാനത്താവളത്തിന്റെ പ്രവര്‍ത്തനം താല്‍ക്കാലികമായി നിര്‍ത്തിവെക്കുകയും ചെയ്തു. ശനിയാഴ്ചയും ഞായറാഴ്ചയും നടന്ന ആക്രമണങ്ങളുടെ ഉത്തരവാദിത്തം ഹൂതി വിമതര്‍ ഇതുവരെ ഏറ്റെടുത്തിട്ടില്ല. എന്നാല്‍, കഴിഞ്ഞ വ്യാഴാഴ്ച ഇതേ വിമാനത്താവളത്തിന് നേരെ നടന്ന ആക്രമണത്തിന് പിന്നില്‍ തങ്ങളാണെന്ന് ഹൂതികള്‍ സമ്മതിച്ചിരുന്നു. അന്ന് മൂന്ന് പേര്‍ കൊല്ലപ്പെടുകയും ഒരു വിമാനത്തിന് കേടുപാടുകള്‍ സംഭവിക്കുകയും ചെയ്തിരുന്നു.
