ആറ്റുകാൽ പൊങ്കാല:സുരക്ഷയൊരുക്കാൻ കൈകോർത്ത് തമിഴ്നാട് പൊലീസും

തിരുവനന്തപുരം : തലസ്ഥാനം ഭക്തജന സാഗരമാകുന്ന പൊങ്കാല ദിവസം ആറ്റുകാലിലും പരിസരത്തും സുരക്ഷയൊരുക്കാൻ തമിഴ്നാട് പൊലീസും കൈകോർക്കും. തമിഴ്നാട് പൊലീസിലെ ‘സ്പോട്ടർ’ വിഭാഗത്തിലെ ഉദ്യോഗസ്ഥരാണ് സുരക്ഷയ്ക്കായി തലസ്ഥാനത്തെത്തുന്നത്. സ്ഥിരം കുറ്റവാളികൾ തമിഴ്നാട്ടിലുണ്ട്. ഇവരെ കണ്ടാൽ സ്പോട്ടർ ടീം അംഗങ്ങൾക്ക് എളുപ്പത്തിൽ തിരിച്ചറിയാം. പൊങ്കാലയ്ക്കിടെയുണ്ടാകുന്ന തിക്കുംതിരക്കും മുതലെടുത്ത് നടക്കാനിടയുള്ള മോഷണം അടക്കമുള്ള കുറ്റകൃത്യങ്ങളുടെ സാധ്യത കണക്കിലെടുത്താണ് കേരള പൊലീസ് തമിഴ്നാട് പൊലീസിന്റെ സഹായം തേടിയത്.

തമിഴ്നാട് പൊലീസിൽ നിന്ന് കുറ്റവാളികളുടെ ചിത്രങ്ങൾ ശേഖരിച്ച് ക്ഷേത്ര ട്രസ്റ്റ് ഭാരവാഹികൾക്കും നിലവിൽ അമ്പലത്തിൽ ഡ്യൂട്ടിയിലുള്ള പൊലീസ് ഉദ്യോഗസ്ഥർക്കും ഇതിനോടകം തന്നെ കൈമാറിയിട്ടുണ്ട്. ഇത് കൂടാതെ കുറ്റവാളികളെ ഭക്തർക്ക് തിരിച്ചറിയാനായി ഇവരുടെ ചിത്രങ്ങൾ വിവിധ സ്ഥലങ്ങളിൽ സ്ഥാപിക്കുമെന്ന് ഡപ്യൂട്ടി പൊലീസ് കമ്മിഷണർ വി. അജിത് വ്യക്തമാക്കി.