മനുഷ്യാവകാശങ്ങൾ നിഷേധിക്കുന്ന സാമൂഹിക വ്യവസ്ഥിതിയോട് സധൈര്യം കലഹിക്കാൻ സഹജീവികളെ പഠിപ്പിച്ച നവോത്ഥാന നായകൻ; ഇന്ന്, ഇരുൾമൂടിയ കേരളത്തിൽ ഉയർന്ന നവോത്ഥാനത്തിന്റെ ഇടിമുഴക്കമായ മഹാത്മാ അയ്യൻകാളിയുടെ സ്‌മൃതി ദിനം

ഉച്ചനീചത്വ ഭാവങ്ങൾ ഏതൊരു സമാജത്തെയും ദുർബലമാക്കുമെന്ന് സ്വയം തിരിച്ചറിയുകയും സഹജീവികളെ പഠിപ്പിക്കുകയും ചെയ്‌ത സാമൂഹ്യ പരിഷ്ക്കർത്താവായിരുന്നു മഹാത്മാ അയ്യങ്കാളി. ജാതിയും ഉപജാതിയുമല്ല ഐക്യവും അഖണ്ഡതയുമാണ് മുദ്രാവാക്യമെന്ന് രാഷ്ട്രത്തെ പഠിപ്പിച്ച മഹാത്മാവിന്റെ ഓർമ്മദിനമാണിന്ന്. സഞ്ചാര സ്വാതന്ത്ര്യമില്ലായ്മയ്ക്കും, വസ്ത്ര ധാരണ നിയന്ത്രണങ്ങൾക്കും വിദ്യാഭ്യാസ അവകാശ നിഷേധത്തിനും എതിരെ സധൈര്യം പോരാടിയ യോദ്ധാവായിരുന്നു ചരിത്രത്തിൽ അയ്യങ്കാളി. അയ്യൻ കാളിയുടെ ആദ്യകാല പ്രവർത്തനങ്ങളുടെ നല്ലൊരു ശതമാനവും വിദ്യാലയ പ്രവേശന പ്രക്ഷോഭങ്ങളുമായി ബന്ധപ്പെട്ടവയായിരുന്നു. 1904-ൽ വെങ്ങാനൂരിൽ തന്റെ കൂട്ടാളികളുമായി ചേർന്നുകൊണ്ട് ദളിതരുടെ ആദ്യത്തെ പള്ളിക്കൂടം അദ്ദേഹം നിർമ്മിച്ചു. പക്ഷെ സവർണർ അന്നു രാത്രി തന്നെ ആ കുടിപ്പള്ളിക്കൂടം തീയിട്ടു. അക്ഷരാഭ്യാസത്തിനുള്ള അവസരനിഷേധം നേരിടാൻ അദ്ദേഹം തെരഞ്ഞടുത്ത വഴിയായിരുന്നു പിൽക്കാലത്തു കാർഷികപണിമുടക്ക് സമരമെന്ന് അറിയപ്പെട്ട കൃഷിഭൂമി തരിശിടൽ സമരം. ഈ സമരത്തിന്റെ ഫലമായി 1907 -ൽ പുലയക്കുട്ടികൾക്കു പള്ളിക്കൂടത്തിൽ പ്രവേശനം അനുവദിച്ചുകൊണ്ടുള്ള ഉത്തരവ് ഉണ്ടായി.

അയിത്തജാതികളിൽപ്പെട്ട കുട്ടികളുടെ പള്ളിക്കൂട പ്രവേശന നിയമം അധികൃതർ കർശനമായി പാലിക്കണമെന്ന് നിർദ്ദേശിച്ചു് 1914-ൽ വിദ്യഭ്യാസ ഡയറക്ടർ ഉത്തരവു പുറപ്പെടുവിച്ചു. പ്രസ്തുത ഉത്തരവിന്റെ പിൻബലത്തിൽ തെന്നൂർകോണത്ത് പൂജാരി അയ്യൻ എന്നയാളുടെ എട്ടു വയസുള്ള മകൾ പഞ്ചമിയെയും കൂട്ടി അയ്യൻകാളിയും സംഘവും നെയ്യാറ്റിൻകര താലൂക്കിലെ ഊരൂട്ടമ്പലം പെൺപള്ളിക്കൂടത്തിൽ എത്തി. അദ്ധ്യാപകന്റെ തടസ്സത്തെ വകവെക്കാതെ അദ്ദേഹം പഞ്ചമിയെ പള്ളിക്കൂടത്തിനുള്ളിലെ ബെഞ്ചിൽ കൊണ്ടിരുത്തി. പഞ്ചമിയെന്ന പുലയപ്പെൺകുട്ടി തൊട്ട ഊരൂട്ടമ്പലം പള്ളിക്കൂടം അന്ന് രാത്രി തന്നെ തീ വെച്ച് നശിപ്പിച്ചുകൊണ്ടാണ് സവർണർ അതിനോട് പ്രതികരിച്ചത്. ഇത്തരമൊരുഘട്ടത്തിലാണ് അയിത്തജാതിക്കാർക്കായി പ്രത്യേക പള്ളിക്കൂടം എന്നൊരാശയം അയ്യൻകാളിക്ക് തോന്നിയത്. ഇതിന്റെ ഫലമായി 1914-ൽ വെങ്ങാനൂർ പുതുവൽവിളാകത്തു മലയാളം പള്ളിക്കൂടം അനുവദിച്ചുകൊണ്ടു സർക്കാർ ഉത്തരവ് പുറപ്പെടുവിച്ചു. 1905-ൽ അയ്യൻകാളിയും കൂട്ടരും കെട്ടിയുയർത്തിയ കുടിപ്പള്ളിക്കൂടമാണ് ഇപ്രകാരം സർക്കാർ പള്ളിക്കൂടമായി മാറിയത്.

വഴിനടക്കാനുള്ള സ്വാതന്ത്ര്യത്തിന് വേണ്ടിയും മാറുമറക്കാനുള്ള അവകാശത്തിനുവേണ്ടിയും നടത്തിയ സമരങ്ങളുടെ അവകാശവാദങ്ങൾ മറ്റുപലരും നടത്താറുണ്ടെങ്കിലും ഈ പോരാട്ടങ്ങളുടെ നേതൃത്വത്തിന്റെ പൂർണ്ണാവകാശം അയ്യങ്കാളിക്കാനെന്നതാണ് ചരിത്ര വസ്തുത. ഒരു കാളവണ്ടി വാങ്ങി, മുണ്ടും മേൽമുണ്ടും വെള്ള ബനിയനും തലപ്പാവും ധരിച്ചു്, പൊതുവീഥിയിലൂടെ സാഹസിക യാത്രനടത്തിയതും, സവർണ്ണ ജാതിക്കാർ ഈ യാത്ര തടഞ്ഞതും, ചരിത്രത്തിന്റെ ഭാഗമാണ്. അയ്യങ്കാളി തന്റെ കയ്യിലുണ്ടായിരുന്ന കത്തി വലിച്ചൂരി സവർണ്ണരെ വെല്ലുവിളിച്ചു. അയ്യൻകാളിയെ എതിരിടാൻ ആർക്കും ധൈര്യമുണ്ടായിരുന്നില്ല. അദ്ദേഹം ആരേയും കൂസാതെ തന്റെ വണ്ടിയിൽ യാത്ര തുടർന്നു. ആവേശഭരിതരായ അനുയായികൾ അദ്ദേഹത്തിന് അകമ്പടി സേവിച്ചു. സ്വന്തം സമുദായത്തിലുള്ളവർ ആദരപൂർവം അദ്ദേഹത്തെ അയ്യങ്കാളി യജമാനൻ എന്നു വിളിക്കുവാൻ തുടങ്ങി. ഇതെല്ലാം അദ്ദേഹത്തിന്റെ വേറിട്ട സമര രീതികളുടെ ഉദാഹരണം തന്നെയാണ്. അദ്ദേഹത്തിന്റെ നേതൃത്വത്തിൽ നടന്ന കല്ലുമാല സമരവും ചരിത്ര പ്രസിദ്ധമാണ്. തിരുവനന്തപുരം ജില്ലയിലെ വെങ്ങാനൂർ എന്ന ഉൾനാടൻ ഗ്രാമമായ പെരുങ്കാറ്റു വിളയിലെ പ്ലാവറ കുടിയിൽ 1863 ഓഗസ്റ്റ് 28ന് (കൊല്ലവർഷം 1039, ചിങ്ങം 14) അയ്യന്റെയും മാലയുടെയും പുത്രനായി ജനിച്ച അയ്യൻകാളി ഇന്നും കേരള നവോത്ഥാന ചരിത്രത്തിലെ അത്ഭുത നക്ഷത്രമാണ്