കൊച്ചി: ടെലഗ്രാം (Telegram) ആപ്പ് നിരോധിക്കണമെന്ന് ആവശ്യപ്പെട്ട് സംവിധായകനും നടനുമായ ബേസില്‍ ജോസഫ്. ഫയൽ ഷെയറിങ് ആപ്പായതിനാൽ പല ആവശ്യങ്ങളും ടെലിഗ്രാമിലൂടെ നടക്കുന്നുണ്ടെങ്കിലും ഈ ആപ്പ് ശരിക്കും ആപ്പിലാക്കിയിരിക്കുന്നത് സിനിമ മേഖലയെയാണെന്ന് ബേസിൽ ജോസഫ് പറഞ്ഞു.
സിനിമയിറങ്ങി ദിവസങ്ങള്‍കൊണ്ട് തന്നെ ടെലഗ്രാമില്‍ അപ്ലോഡ് ആകുന്നത് കൊണ്ടാണ് ബേസില്‍ ഈ ആവശ്യവുമായി രംഗത്തെത്തിയത്. കഴിഞ്ഞ ദിവസം മരക്കാര്‍ അറബിക്കടലിന്റെ സിംഹം എന്ന മോഹന്‍ലാല്‍ ചിത്രത്തിന്റെ പ്രിന്റും ടെലഗ്രാമില്‍ ലഭ്യമായിരുന്നു. ടെലിഗ്രാം ഒരു ആപ്പെന്ന നിലയില്‍ നിരോധിക്കാന്‍ പറ്റില്ലായിരിക്കാം പക്ഷേ, അതിലെ ഗ്രൂപ്പുകളിലേക്കു തിയറ്റര്‍ റിലീസായ ചിത്രങ്ങളും ഒടിടി ചിത്രങ്ങളും എത്തുന്നതു തടയാനുള്ള നിയമ സംവിധാനം വരേണ്ടതുണ്ട്. അത് എന്തുകൊണ്ട് വരുന്നില്ലായെന്നോര്‍ത്ത് ആശങ്കയുണ്ടെന്നും ബേസില്‍ പറഞ്ഞു.
