ദില്ലി : സിസ്റ്റർ അഭയ കൊലക്കേസിൽ മൂന്നാം പ്രതി സിസ്റ്റർ സെഫിയെ കന്യകാത്വ പരിശോധനയ്ക്ക് വിധേയയാക്കിയതിനെതിരെ അവർ സമർപ്പിച്ച ഹർജിയിൽ അനുകൂല വിധി പ്രസ്ഥാവിച്ച് ദില്ലി ഹൈക്കോടതി. കന്യകാത്വ പരിശോധന ഭരണഘടന വിരുദ്ധമാണെന്നും അത് നടത്തരുതെന്നും ദില്ലി ഹൈക്കോടതി പ്രസ്താവിച്ചു. കേസന്വേഷണത്തിന്റെ ഭാഗമായിട്ടാണ് മൂന്നാം പ്രതിയായ സിസ്റ്റര്‍ സെഫിയുടെ കന്യകാത്വ പരിശോധന നടത്തിയത്.
ദില്ലി ഹൈക്കോടതിയിലെ ജസ്റ്റിസ് എസ്. കെ. ശര്‍മ്മയുടേതാണ് വിധി. സിബിഐ നടത്തിയ കന്യകാത്വ പരിശോധനയ്‌ക്കെതിരെ 2009-ല്‍ നല്‍കിയ ഹര്‍ജി തീര്‍പ്പാക്കികൊണ്ടാണ് വിധി. ക്രിമിനല്‍ കേസില്‍ പ്രതിയാണെന്ന് കരുതി കന്യാകാത്വ പരിശോധന നടത്താന്‍ കഴിയില്ല. ഇരയാണോ, പ്രതിയാണോ എന്നത് ഒരിക്കലും ഇത്തരം പരിശോധന നടത്തുന്നതിന് ന്യായീകരണമല്ലെന്ന് കോടതി നിരീക്ഷിച്ചു.
പൗരന്റെ സ്വകാര്യതയും അന്തസ്സും ലംഘിക്കുന്നതിനാല്‍ കന്യകാത്വ പരിശോധന നടത്തരുതെന്നും വിധിയില്‍ നിര്‍ദേശിച്ചിട്ടുണ്ട്. അതെ സമയം നിലവിലെ കേസിലെ നടപടികൾക്ക് ശേഷം സി.ബി.ഐക്കെതിരെ മാനനഷ്ടത്തിനും മനുഷ്യാവകാശ ലംഘനത്തിനും കേസ് നല്‍കാന്‍ സിസ്റ്റര്‍ സെഫിക്ക് അവകാശമുണ്ടെന്നും ഡല്‍ഹി ഹൈക്കോടതി വിധിച്ചു.
സിസ്റ്റർ സെഫി കന്യാകാത്വ പരിശോധനക്കെതിരെ നേരത്തെ മനുഷ്യാവകാശ കമ്മീഷന് പരാതി നൽകിയിരുന്നെങ്കിലും തള്ളിയിരുന്നു. തുടർന്നാണ് ഇവർ ഹൈക്കോടതിയെ സമീപിച്ചത്. അഭിഭാഷകരായ റോമി ചാക്കോ, വി.എസ് റോബിന്‍ എന്നിവരാണ് സിസ്റ്റർ സെഫിക്ക് ഡല്‍ഹി ഹൈക്കോടതിയില്‍ ഹാജരായത്
