തിരുവനന്തപുരം: കുട്ടികളിൽ ചെറുപ്രായത്തിൽ തന്നെ ലളിതമായ സമ്പാദ്യശീലവും സാമ്പത്തിക അച്ചടക്കവും വളർത്തിയെടുക്കുക എന്ന ലക്ഷ്യത്തോടെ മണികണ്ഠേശ്വരം ശ്രീ ശങ്കര വിദ്യാപീഠം ആവിഷ്കരിച്ച ‘ഭവിഷ്യം ഭദ്രം’ പദ്ധതിക്ക് ഉജ്ജ്വല തുടക്കം. വിദ്യാലയത്തിന്റെ പന്ത്രണ്ടാമത് വാർഷികാഘോഷങ്ങളോടനുബന്ധിച്ച് അഹാദിഷിക ഫൗണ്ടേഷന്റെ സഹകരണത്തോടെ നടപ്പിലാക്കുന്ന ഈ പദ്ധതിയുടെ ഉദ്ഘാടനം നടനും ബിജെപി നേതാവുമായ കൃഷ്ണകുമാർ ജി നിർവ്വഹിച്ചു. നെട്ടയം എംഎകെ ഓഡിറ്റോറിയത്തിൽ നടന്ന ചടങ്ങിൽ നൂറുകണക്കിന് വിദ്യാർത്ഥികളും രക്ഷിതാക്കളും പങ്കെടുത്തു.
സമ്പാദ്യമെന്നത് കേവലം പണം കരുതിവെക്കലല്ല, മറിച്ച് അത് ജീവിതത്തിന് നൽകുന്ന സുരക്ഷയും ആത്മവിശ്വാസവുമാണെന്ന് കൃഷ്ണകുമാർ വിദ്യാർത്ഥികളെ ഓർമ്മിപ്പിച്ചു. ഇന്നത്തെ ചെറിയ സമ്പാദ്യങ്ങൾ നാളത്തെ വലിയ സ്വപ്നങ്ങൾ സാക്ഷാത്കരിക്കാൻ കുട്ടികളെ സഹായിക്കുമെന്നും അദ്ദേഹം കൂട്ടിച്ചേർത്തു. പദ്ധതിയുടെ ഭാഗമായി വിദ്യാർത്ഥികൾക്ക് പ്രത്യേകമായി രൂപകൽപ്പന ചെയ്ത ‘മണി ബാങ്കുകൾ’ അദ്ദേഹം വിതരണം ചെയ്തു. കളികളിലൂടെയും ലളിതമായ സംഭാഷണങ്ങളിലൂടെയും സമ്പാദ്യത്തിന്റെ പ്രാധാന്യം അദ്ദേഹം കുട്ടികൾക്ക് വിവരിച്ചുകൊടുത്തു.ഭവിഷ്യം ഭദ്രം': വിദ്യാർത്ഥികളിൽ സമ്പാദ്യശീലം വളർത്താൻ പുത്തൻ പദ്ധതി; ഉദ്ഘാടനം നിർവ്വഹിച്ച് നടനും ബിജെപി നേതാവുമായ കൃഷ്ണകുമാർ ജി pic.twitter.com/YSFOUJsner
— Tatwamayi News (@TatwamayiNews) January 31, 2026
ശ്രീ ശങ്കര വിദ്യാപീഠത്തിന്റെ പന്ത്രണ്ടാം വാർഷികാഘോഷങ്ങളുടെ ഭാഗമായി സംഘടിപ്പിച്ച ചടങ്ങിൽ സ്കൂൾ അധികൃതരും അഹാദിഷിക ഫൗണ്ടേഷൻ പ്രതിനിധികളും സന്നിഹിതരായിരുന്നു. വിദ്യാഭ്യാസത്തോടൊപ്പം തന്നെ സാമൂഹിക ബോധവും പ്രായോഗിക ജീവിത നൈപുണ്യങ്ങളും പകർന്നുനൽകുന്ന വിദ്യാലയത്തിന്റെ ഇത്തരം പ്രവർത്തനങ്ങൾ മാതൃകാപരമാണെന്ന് ചടങ്ങിൽ സംസാരിച്ചവർ അഭിപ്രായപ്പെട്ടു.
