ബിഗ് ബോസ് മലയാളം ‘അഗ്നിപരീക്ഷ’യിലെ നാലാം എവിക്ഷൻ പൂർത്തിയായതോടെ നാല് മത്സരാർഥികൾ കൂടി ഷോയിൽ നിന്ന് പുറത്തായി. ഇതോടെ 28 മത്സരാർഥികളിൽ നിന്ന് ഷോ 24 പേരിലേക്ക് ചുരുങ്ങി. സോണി, സാബിറ, റിജോ, ജെറ്റി എന്നിവരാണ് നാലാം എവിക്ഷനിലൂടെ പുറത്തായത്.
പതിവുപോലെ ഏഴ് പേരടങ്ങുന്ന നാല് ടീമുകളായാണ് മത്സരാർഥികൾ ഇത്തവണയും ടാസ്കിൽ മാറ്റുരച്ചത്. ഓരോ ടീമിലും മൂന്ന് പ്രൊട്ടക്ടർമാരും നാല് അറ്റാക്കർമാരുമായിരുന്നു ഉണ്ടായിരുന്നത്. സ്വന്തം ടീമിന്റെ അതിർത്തി സംരക്ഷിക്കുന്നതിനൊപ്പം എതിർ ടീമിന്റെ അതിർത്തിയിലെ ബോട്ടിലുകൾ വീഴ്ത്തുക എന്നതായിരുന്നു ടാസ്കിന്റെ ലക്ഷ്യം.
രണ്ട് ടീമുകൾക്കും പ്രത്യേകം സോണുകൾ നിശ്ചയിച്ചിരുന്നു. അറ്റാക്കർമാർക്ക് ലഭിച്ച പന്തുകൾ ഉപയോഗിച്ച് എതിർ ടീമിന്റെ ബോട്ടിലുകൾ വീഴ്ത്താമായിരുന്നു. ബസ്സർ അവസാനിക്കുമ്പോൾ സ്വന്തം സോണിൽ കൂടുതൽ ബോട്ടിലുകൾ നിലനിർത്തുന്ന ടീമാണ് വിജയികളായത്.
ആദ്യ സെക്ഷനിൽ രഞ്ജിനിയുടെ ടീം വിജയിച്ചപ്പോൾ അഖിൽ മാരാരുടെ ടീം പരാജയപ്പെട്ടു. മികച്ച പ്രകടനം കാഴ്ചവെച്ച വൈശാഖിനും ഷിജിനും ഇൻഫിനിറ്റി പെൻഡന്റ് ലഭിച്ചു. അതേസമയം സോണി, സോനാ, അഭിരാം, സാബിറ, റിജോ എന്നിവർ ഔട്ട് ഹൗസിലേക്ക് മാറ്റപ്പെട്ടു.
രണ്ടാം സെക്ഷനിൽ റിയാസിന്റെയും റനീഷയുടെയും ടീമുകളാണ് ഏറ്റുമുട്ടിയത്. ഇതിൽ റിയാസിന്റെ ടീം വിജയിച്ചു. അഫിയാനസിനും ഷിബിനും ഇൻഫിനിറ്റി പെൻഡന്റ് ലഭിച്ചപ്പോൾ എൽദോ, ഷിംജിത്ത്, ഷിജുലാൽ, ജെറ്റി, പ്രണവ് എന്നിവർ ഔട്ട് ഹൗസിലെത്തി.
ഇങ്ങനെ ഔട്ട് ഹൗസിലെത്തിയ പത്ത് പേരിൽ നിന്നാണ് പിന്നീട് എവിക്ഷൻ നടന്നത്. ഇതിൽ ആറ് പേർ സേവ് ആയപ്പോൾ നാല് പേർക്ക് ഷോയിൽ നിന്ന് പുറത്തുപോകേണ്ടിവന്നു.
ആദ്യമായി സോണിയാണ് പുറത്തായത്. ടാസ്കിൽ പ്രതീക്ഷിച്ച പ്രകടനം നടത്താൻ കഴിഞ്ഞില്ലെന്നും ബിഗ് ബോസ് മെറ്റീരിയലായി മാറാൻ സാധിച്ചില്ലെന്നുമാണ് ജഡ്ജസ് വിലയിരുത്തിയത്.
രണ്ടാമതായി പുറത്തായത് സാബിറയാണ്. സാബിറയിൽ നിന്ന് കൂടുതൽ മികച്ച പങ്കാളിത്തം പ്രതീക്ഷിച്ചിരുന്നുവെന്നും ഇത്രയും ദിവസങ്ങൾ പിന്നിട്ടിട്ടും തന്റെ വ്യക്തിത്വം പൂർണമായി പുറത്തുകൊണ്ടുവരാൻ കഴിഞ്ഞില്ലെന്നും ജഡ്ജസ് അഭിപ്രായപ്പെട്ടു.
തുടർന്ന് റിജോയും പുറത്തായി. റിജോയിൽ നിന്നും കൂടുതൽ മികച്ച പ്രകടനം പ്രതീക്ഷിച്ചിരുന്നുവെന്നായിരുന്നു ജഡ്ജസിന്റെ പ്രതികരണം.
നാലാമതായി ജെറ്റിയാണ് എവിക്ടായത്. ജെറ്റി ഏറെ ഇമോഷണലായ വ്യക്തിയാണെന്നും എന്നാൽ ബിഗ് ബോസ് ഹൗസിൽ അതിനേക്കാൾ വ്യത്യസ്തമായ ഗെയിം സമീപനമാണ് ആവശ്യമെന്നും ജഡ്ജസ് വിലയിരുത്തി.
അതേസമയം, കഴിഞ്ഞ ടാസ്കുകളിൽ മികച്ച പ്രകടനം കാഴ്ചവെച്ച ഷിജുലാലും പ്രണവും ഇത്തവണ ഔട്ട് ഹൗസിലെത്തിയത് ശ്രദ്ധേയമായി. വരും ദിവസങ്ങളിൽ ഇരുവരിൽ നിന്നും കൂടുതൽ മികച്ച പ്രകടനം പ്രതീക്ഷിക്കുന്നതായും ജഡ്ജസ് വ്യക്തമാക്കി.
നാലാം എവിക്ഷൻ പൂർത്തിയായതോടെ ഷോയിൽ ഇനി 24 മത്സരാർഥികളാണ് അവശേഷിക്കുന്നത്. മുന്നോട്ടുള്ള ഓരോ ടാസ്കുകളും നിർണായകമാകുന്നതിനാൽ മത്സരത്തിന്റെ ആവേശവും പോരാട്ടവും കൂടുതൽ ശക്തമാകുമെന്നാണ് പ്രതീക്ഷ. ടോപ് ടെൻ മത്സരാർഥികൾ ആരൊക്കെയാകും എന്നതും ഇനി അറിയാനുണ്ട്. അവരിൽ നിന്ന് ആരൊക്കെയാണ് ബിഗ് ബോസ് ഹൗസിലേക്ക് പ്രവേശിക്കുക എന്നറിയാനുള്ള കാത്തിരിപ്പിലാണ് പ്രേക്ഷകർ.
