ചാവക്കാട്: തൃശ്ശൂരിലെ ചാവക്കാട് ബിജെപി പ്രവർത്തകനെ (BJP Worker Murder)കുത്തിക്കൊന്ന സംഭവത്തിൽ രണ്ടുപേർ പോലീസ് പിടിയിൽ. അനീഷ്, സുനീർ എന്നിവരാണ് കസ്റ്റഡിയിലായത്. മണത്തല കൊപ്പര വീട്ടിൽ ബിജു ആണ് കൊല്ലപ്പെട്ടത്. എസ്ഡിപിഐ പ്രവർത്തകരാണ് കൊലപാതകത്തിനു പിന്നിൽ എന്ന് ബിജെപി ആരോപിച്ചിരുന്നു. ബൈക്കിൽ വന്ന മൂന്ന് പേരാണ് ബിജുവിനെ കുത്തി വീഴ്തിയത്. ഇതിൽ രണ്ട് പേരാണ് നിലവിൽ പിടിയിലായിട്ടുള്ളത്.
പ്രവാസിയായ ബിജു മൂന്ന് മാസം മുൻപാണ് നാട്ടിലെത്തിയത്. മറ്റൊരു ജോലിക്കായി വീണ്ടും ശ്രമിക്കുമ്പോഴാണ് ദാരുണ സംഭവം അരങ്ങേറിയത്. സംഭവത്തിൽ പ്രതിഷേധിച്ച് ഇന്ന് ചാവക്കാട് മുനിസിപ്പാലിറ്റിയിലും കടപ്പുറം പഞ്ചായത്തിലും ബിജെപി ഹർത്താൽ ആഹ്വാനം ചെയ്തിരുന്നു. സംഘർഷങ്ങളൊന്നും നിലവിലില്ലാത്ത പ്രദേശത്ത് പ്രശ്നങ്ങൾ സൃഷ്ടിക്കണമെന്ന ബോധപൂർവ്വമായ ഉദ്ദേശത്തോടെയാണ് കൊലപാതകം ആസൂത്രണം ചെയ്ത് നടപ്പാക്കിയതെന്നും ബിജെപി ആരോപിച്ചിരുന്നു.
ഇന്നലെ വൈകിട്ട് അഞ്ചു മണിയോടെ ചാപറമ്പ് സ്‌കൂളിന് കിഴക്കു ഭാഗത്ത് വച്ചാണ് സംഭവം നടന്നത്. ബൈക്കിൽ വന്ന മൂന്നുപേർ ബിജുവിനെ കുത്തി വീഴ്ത്തുകയായിരുന്നു. കൃത്യത്തിന് ശേഷം പ്രതികൾ രക്ഷപ്പെട്ടു. ഓടികൂടിയ നാട്ടുകാർ ചാവക്കാട്ടെ ബിജുവിനെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.
