വീണ്ടും വ്യത്യസ്തതയൊരുക്കി ബിജെപി; കേരളത്തിൽ കഷ്ടപ്പെടുന്ന പാർട്ടി പ്രവർത്തകർക്ക് താമര തണലുമായി ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ

കേരളത്തിൽ കഷ്ടപ്പെടുന്ന പാർട്ടി പ്രവർത്തകർക്ക് ആശ്വാസമായി ബിജെപി. സംസ്ഥാന അദ്ധ്യക്ഷൻ കെ.സുരേന്ദ്രന്റെ നേതൃത്വത്തിൽ ‘താമര തണൽ’ എന്ന സേവാപ്രവർത്തനം ബിജെപി ആരംഭിച്ചു കഴിഞ്ഞു. പാർട്ടി പ്രവർത്തനത്തിനിടെ അപകടം പറ്റിയവർക്കും ദുരിതപൂർണ്ണമായ ജീവിതം നയിക്കുന്നവർക്കും നേരിട്ട് സാമ്പത്തിക സഹായമെത്തിക്കുന്ന പദ്ധതിയാണ് താമര തണൽ.

മാരാർജി ട്രെസ്റ്റിന്റെ നേതൃത്വത്തിലാണ് അർഹതപ്പെട്ട ജനങ്ങൾക്കായി സാമ്പത്തിക സഹായം വിതരണം ചെയ്യുന്നത്. കെ.സുരേന്ദ്രൻ നേരിട്ടാണ് സഹായധനം കൈമാറുന്നത്. കോവളം കൊട്ടാരം സമര സമയത്ത് പോലീസിന്റെ അതിക്രൂരമായ മർദ്ദനത്തിൽ ചലന ശേഷി നഷ്ട്ടപെട്ടു ചികിത്സയിൽ കഴിയുന്ന മുൻ ബിജെപി പഞ്ചായത്ത് പ്രസിഡന്റ് വെങ്ങാനൂർ സ്വദേശി രാദേഷ് കുമാറിന് (കുട്ടൻ) കെ.സുരേന്ദൻ ചികിത്സക്കായുള്ള ധനസഹായം കൈമാറി.

കല്ലുവാതുക്കൽ പഞ്ചായത്തിലെ മീനമ്പലത്ത് കഴിഞ്ഞ ലോക്സഭ തെരഞ്ഞെടുപ്പ് കാലത്ത് കൊടികെട്ടുന്നതിനിടെ മരത്തിൽ നിന്ന് വീണ് മരണപ്പെട്ട ബിജെപി പ്രവർത്തകൻ സുജിത്തിന്റെ കുടുംബത്തിനുള്ള ധനസഹായവും സംസ്ഥാന അദ്ധ്യക്ഷൻ വിതരണം ചെയ്തു. വരും ദിവസങ്ങളിൽ മലബാറിൽ ഉൾപ്പെടെ കൂടുതൽ പ്രവർത്തകർക്ക് സംസ്ഥാന അദ്ധ്യക്ഷന്റെ താമര തണലെത്തും.

മറ്റ് പാർട്ടികളിൽ നിന്നും വ്യത്യസ്തമായാണ് ബിജെപി ചിന്തിക്കുന്നത്. അതിനാൽ തന്നെ അർഹതപ്പെട്ടവരാണെങ്കിൽ പാർട്ടി പ്രവർത്തകരല്ലെങ്കിലും സഹായ ഹസ്തം താമര തണലിൽ നിന്നും ലഭിക്കും. ഇതിന്റെ ഭാ​ഗമായി തിരുവനന്തപുരം കിംസ് ആശുപത്രിയിൽ കിഡ്‌നി മാറ്റിവയ്ക്കുവാനുള്ള ചികത്സയിൽ കഴിയുന്ന വിദ്യാർഥിനിയായ കൊല്ലം ജില്ലയിലെ മതിലിൽ പ്രീതി നിവാസിൽ സ്റ്റെഫിക്ക് മാരാർജി ട്രസ്റ്റ് നൽകുന്ന ധനസഹായം നൽകി. കെ.സുരേന്ദ്രൻ സ്റ്റെഫിയുടെ അമ്മ വിനീതയ്ക്ക് നേരിട്ട് ചികിത്സയ്ക്കായുള്ള പണം നൽകി. കൂടാതെ കിംസ് ആശുപത്രിയുമായി ബന്ധപ്പെട്ട് സ്റ്റെഫിക്ക് തുടർന്നും എല്ലാ സഹായങ്ങളും ബിജെപി ഉറപ്പു വരുത്തുമെന്ന് കെ.സുരേന്ദ്രൻ പറഞ്ഞു.