ദില്ലി: വെള്ളക്കെട്ടിൽ നിന്ന് രക്ഷപ്പെടാൻ വൈദ്യുത തൂണിൽ പിടിച്ച യുവതിക്ക് ഷോക്കേറ്റ് ദാരുണാന്ത്യം. കിഴക്കൻ ദില്ലിയിലെ പ്രീത് വിഹാർ സ്വദേശിയായ സാക്ഷി അഹൂജ എന്ന യുവതിയാണ് മരിച്ചത്. കഴിഞ്ഞ രാത്രി മുതൽ ദില്ലിയിൽ കനത്ത മഴയായിരുന്നു. കുടുംബത്തിനൊപ്പം പുലർച്ചെ അഞ്ചരയോടെ റെയിൽവേ സ്റ്റേഷനിലെത്തിയതായിരുന്നു യുവതി. വെള്ളക്കെട്ടിൽ നിന്ന് രക്ഷപ്പെടാൻ വൈദ്യുത തൂണിൽ പിടിച്ചപ്പോൾ ഷോക്കേൽക്കുകയായിരുന്നു. യുവതിയെ ആശുപത്രിയിലെത്തിച്ചെങ്കിലും ചികിത്സയ്ക്കിടെ മരിച്ചെന്ന് പോലീസ് പറഞ്ഞു.
റെയിൽവേ സ്റ്റേഷന്റെ എക്സിറ്റ് നമ്പർ വണ്ണിന് സമീപമാണ് അപകടമുണ്ടായത്. അധികാരികളുടെ അനാസ്ഥ ആരോപിച്ച് യുവതിയുടെ സഹോദരി പരാതി നൽകി. സംഭവത്തിൽ പോലീസ് കേസെടുത്തു. ദൃശ്യങ്ങളിൽ തൂണിന്റെ അടിയിൽ സുരക്ഷാ സംവിധാനമില്ലാതെ വൈദ്യുത കമ്പികൾ കാണാം. സംഭവത്തെക്കുറിച്ച് റെയിൽവേയും പോലീസും അന്വേഷണം ആരംഭിച്ചു. ദില്ലിയിൽ മഴ തുടരുകയാണ്.
