ലോകമെമ്പാടുമുള്ള രാജ്യങ്ങളിലെ സർക്കാർ വകുപ്പുകളിൽ നിന്ന് ചൈന ടെലികോം, സർവൈലൻസ് ഉപകരണങ്ങൾ വഴി രഹസ്യ വിവരങ്ങൾ ചോർത്തുന്നു എന്ന് ഒരു അന്താരാഷ്ട്ര മാധ്യമം റിപ്പോർട്ട് ചെയ്തത് ഈ വർഷം ആദ്യമാണ്. ചൈനീസ് കമ്പനികളെ കുറിച്ചുള്ള ഇത്തരം വാർത്തകൾ പുതിയതല്ല. മാൽവെയറുകൾ കമ്പ്യൂട്ടർ നെറ്റ്വർക്ക്കളിലേക്ക് കടത്തിവിട്ട് രഹസ്യങ്ങൾ ചോർത്തിയതിന് ചില ചൈനീസ് കമ്പനികളെ അമേരിക്ക കയ്യോടെ പൊക്കിയ ചരിത്രമുണ്ട്. ചില ചൈനീസ് കമ്പനികളെയും ഉപകരണങ്ങളെയും അമേരിക്കയും ബ്രിട്ടനും നിരോധിച്ചിട്ടുമുണ്ട്. ചൈനീസ് കമ്പനികളെ പല രാജ്യങ്ങളും ഇപ്പോഴും സംശയത്തോടുകൂടിയാണ് കാണുന്നത്. ഈ കമ്പനികൾക്ക് ചൈനീസ് സർക്കാരുമായും ഇന്റലിജിൻസ് ഏജൻസികളുമായുള്ള ബന്ധമാണ് ഇതിന് കാരണം. ഇത്തരം കമ്പനികൾ ശേഖരിക്കുന്ന വിവരങ്ങൾ സർക്കാരും ചൈനീസ് കമ്മ്യൂണിസ്റ്റ് പാർട്ടിയും, സൈന്യവും എളുപ്പത്തിൽ കൈക്കലാക്കുന്നു. ഇന്ത്യയും ഒട്ടനവധി ചൈനീസ് ആപ്പുകളെ ഇതിനോടകം ഘട്ടം ഘട്ടമായി നിരോധിച്ചു. ഈയടുത്ത കാലത്താണ് ഓസ്ട്രേലിയ എല്ലാ സർക്കാർ ഓഫീസുകളിൽ നിന്നും ചൈനീസ് നിർമ്മിത സിസിടിവി ക്യാമറകൾ എടുത്തുമാറ്റാൻ ഉത്തരവിട്ടത്. ഇത്തരം ക്യാമറകൾ വിവരങ്ങൾ ചോർത്തുന്നു എന്ന റിപ്പോർട്ടുകളെ തുടർന്നായിരുന്നു തീരുമാനം. ഇതിനെ തുടർന്ന് അമേരിക്കയും ബ്രിട്ടനും ചൈനീസ് നിർമ്മിത ക്യാമറകളെ നിരീക്ഷിക്കുകയാണ്.
ചൈന ഇന്ത്യയിൽ നിന്ന് നിരന്തരം വിവരങ്ങൾ ചോർത്താൻ ശ്രമിക്കുന്നുണ്ട്. മാസങ്ങൾക്ക് മുമ്പാണ് ഈ ലക്ഷ്യത്തോടെ ചൈനീസ് ചാരക്കപ്പൽ ശ്രീലങ്കൻ തുറമുഖത്ത് നങ്കൂരമിട്ടത്. അന്ന് സിഗ്നൽ ജാമാക്കി ഇന്ത്യ ആ നീക്കത്തെ പ്രതിരോധിച്ചിരുന്നു. അതിന് ശേഷമാണ് മാലിദ്വീപിൽ റഡാർ നിലയം ഒരുക്കാൻ ചൈന ശ്രമം നടത്തുന്നത്. ഇങ്ങനെ നമ്മുടെ രാജ്യം ഉൾപ്പെടെയുള്ള ലോകരാജ്യങ്ങൾ ചൈനയുടെ രഹസ്യം ചോർത്തലിനെ പ്രതിരോധിക്കുമ്പോഴാണ് കെ ഫോണിന് വേണ്ടി 2600 കിലോമീറ്റർ ദൂരം ചൈനീസ് കേബിളുകളും മറ്റ് ഉപകരണങ്ങളും വാങ്ങി സർക്കാർ കേരളത്തിൽ തലങ്ങും വിലങ്ങും വിളിച്ചിരിക്കുന്നത്. മാത്രമല്ല എല്ലാ സർക്കാർ ഓഫിസുകളെയും സെർവറുകളെയും തമ്മിൽ ബന്ധിപ്പിച്ചിരിക്കുകയും ചെയ്യുന്നു.
