ദില്ലി: കോവിഡ് വ്യാപനം അതിരൂക്ഷമായി തുടരുന്ന കേരളമാണ് ഇപ്പോള് ദേശീയതലത്തിലെ പ്രധാന ചര്ച്ചാ വിഷയം. രാജ്യത്ത് കോവിഡ് കേസുകളുടെ എണ്ണം കുറയുമ്പോഴും കേരളത്തിലെ രോഗവ്യാപനം പ്രതിദിനം വര്ധിച്ചുവരികയാണ്. മൂന്നാം തരംഗമുണ്ടാകുമെന്ന വിദഗ്ധാഭിപ്രായം കണക്കിലെടുത്ത് എല്ലാവരും അതീവ ജാഗ്രത പാലിക്കണമെന്നാണ് ആരോഗ്യവകുപ്പിന്റെ നിർദ്ദേശം. മാത്രമല്ല കേരളത്തിൽ അതിവ്യാപന ശേഷിയുള്ള ഡെൽറ്റ വൈറസിന്റെ സാന്നിധ്യവുമുണ്ടെന്നും മുന്നറിയിപ്പ് നൽകിയിട്ടുണ്ട്.
അതേസമയം രാജ്യത്ത് അതിതീവ്രമായി കോവിഡ് വ്യാപനം തുടരുന്ന പത്ത് സംസ്ഥാനങ്ങളിലെ സ്ഥിതിഗതികള് കേന്ദ്ര സര്ക്കാര് വിലയിരുത്തി. 10 ശതമാനത്തില് അധികം ടി.പി.ആര് രേഖപ്പെടുത്തുന്ന ജില്ലകളില് കര്ശന നിയന്ത്രണം ഏര്പ്പെടുത്തണമെന്നും ഒരു ഇളവും നല്കാന് പാടില്ലെന്നും കേന്ദ്രം സംസ്ഥാനങ്ങള്ക്ക് നിര്ദ്ദേശം നല്കി. കേരളം ഉള്പ്പെടെയുള്ള സംസ്ഥാനങ്ങളിലെ സ്ഥിതിഗതികള് കേന്ദ്ര സര്ക്കാര് അവലോകനം ചെയ്തു.
ഇതേത്തുടർന്ന് ജില്ലകളിലെ ടെസ്റ്റ് പോസിറ്റിവിറ്റി നിരക്ക് 10 ശതമാനത്തിലധികമാണെങ്കില് കര്ശന നിയന്ത്രണം നടപ്പിലാക്കണമെന്ന് കേന്ദ്രം നിര്ദ്ദേശിക്കുന്നു. ജനങ്ങളുടെ യാത്രയില് നിയന്ത്രണം വേണമെന്നും ആള്ക്കൂട്ടമുണ്ടാകുന്ന ഒരു കൂടിച്ചേരലുകള്ക്ക് അനുവാദം നല്കരുതെന്നും കേന്ദ്രം അറിയിച്ചു. നിയന്ത്രണങ്ങള് അനുവദിച്ചാല് കാര്യങ്ങള് ഗുരുതരമാകുമെന്നും കേന്ദ്രം മുന്നറിയിപ്പ് നല്കി.
കൂടാതെ പ്രതിദിനം 22,000ത്തിലധികം പോസിറ്റീവ് കേസുകള് റിപ്പോര്ട്ട് ചെയ്യപ്പെടുന്നതിനാല് കേരളത്തിലെ കോവിഡ് സാഹചര്യം വിലയിരുത്താനായി കേന്ദ്രസര്ക്കാര് പ്രത്യേക സംഘത്തെ അയച്ചിരിക്കുകയാണ്. നാഷണല് സെന്റര് ഫോര് ഡിസീസ് കണ്ട്രോള് ഡയറക്ടറായ ഡോ.സുജീത് സിംഗിന്റെ നേതൃത്വത്തിലുള്ള കേന്ദ്രസംഘം കോവിഡ് വ്യാപനത്തെ പ്രതിരോധിക്കാന് സംസ്ഥാന ആരോഗ്യ വകുപ്പിനെ സഹായിക്കും എന്നതാണ് പ്രതീക്ഷ.
പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona
