കന്യാകുമാരി: വയനാട്ടില് രാഹുല് ഗാന്ധിക്കെതിരെ സിപിഎം പടയൊരുക്കം ശക്തമാക്കുമ്പോള് തമിഴ്നാട്ടില് രാഹുല് ഗാന്ധിയ്ക്കായാണ് സിപിഎം വോട്ടു തേടുന്നത്. കന്യാകുമാരി മണ്ഡലത്തില് കോണ്ഗ്രസ് സ്ഥാനാര്ത്ഥി എച്ച് വസന്ത കുമാറിന്റെ പ്രധാന പ്രചാരകന് സിപിഎം ജില്ലാ സെക്രട്ടറി ആര് ചെല്ലസ്വാമിയാണ്.
എച്ച് വസന്ത്കുമാറിന്റെ പ്രചാരണം നാഗര്കോവിലിനടുത്തുള്ള തേങ്ങാപട്ടണത്ത് പുരോഗമിക്കുകയാണ്. കന്യാകുമാരിയില് ഇടത് പാര്ട്ടികള്ക്ക് കാര്യമായ വേരോട്ടമുളള പ്രദേശമാണ് തേങ്ങാപ്പട്ടണം. 2004ല് ഡിഎംകെ കോണ്ഗ്രസ് പിന്തുണയില് സിപിഎം സ്ഥാനാര്ത്ഥി ബല്ലാര്മിന് പൊന്രാധാകൃഷ്ണനെ ഒന്നേമുക്കാല് ലക്ഷം വോട്ടുകള്ക്ക് തറ പറ്റിച്ചപ്പോള് ഏറ്റവുമധികം ഭൂരിപക്ഷം നല്കിയ മേഖല.
എന്നാല്, ഇക്കുറി കോണ്ഗ്രസ് സ്ഥാനാര്ത്ഥി വസന്ത കുമാറിന്റെ വിജയത്തിനായാണ് സിപിഎം സിപിഐ പ്രവര്ത്തകര് കൈമെയ് മറന്ന് പ്രവര്ത്തിക്കുന്നത്. രാജ്യത്തെ രക്ഷിക്കാന് രാഹുലിന് വോട്ടു ചെയ്യൂ എന്ന അനൗണ്സ്മെന്റിനൊപ്പം ആവേശത്തോടെ ഇവരും കൈയടിക്കുന്നു.
അതേസമയം, രാഹുലിന്റെ സ്ഥാനാര്ത്ഥിത്വത്തെ മുന്നിര്ത്തി കോണ്ഗ്രസിനും സിപിഎമ്മിനുമെതിരെ അവസരവാദ രാഷ്ട്രീയമെന്ന ആരോപണവുമായി ബിജെപിയും രംഗത്തെത്തി.
2014ല് ഡിഎംകെയും കോണ്ഗ്രസും സിപിഎമ്മും ഒറ്റക്കൊറ്റയ്ക്ക് മത്സരിച്ചതായിരുന്നു തമിഴ്നാട്ടില് ബിജെപിക്ക് അക്കൗണ്ട് തുറക്കാന് വഴിയൊരുക്കിയത്.