തിരുവനന്തപുരം: മുൻ മുഖ്യമന്ത്രി പിണറായി വിജയന്റെ വസതിക്ക് മുന്നിൽ വെച്ച് ഇ.ഡി ഉദ്യോഗസ്ഥർക്കും അവരുടെ വാഹനത്തിനും നേരെ ഇന്ന് നടന്ന ആക്രമണം അങ്ങേയറ്റം ലജ്ജാകരമാണെന്ന് ബി.ജെ.പി സംസ്ഥാന അധ്യക്ഷൻ രാജീവ് ചന്ദ്രശേഖർ എം.എൽ.എ. ഉത്തരവാദിത്തങ്ങളിൽ നിന്നും നിയമത്തിന് മുന്നിൽ നിന്നും ഒളിച്ചോടാനുള്ള സി.പി.എമ്മിന്റെ കടുത്ത വിമുഖതയാണ് ഈ തെരുവ് ഗുണ്ടായിസത്തിലൂടെ വീണ്ടും തുറന്നുകാട്ടപ്പെട്ടിരിക്കുന്നതെന്നും അദ്ദേഹം വിമർശിച്ചു.
ഔദ്യോഗിക കൃത്യനിർവ്വഹണത്തിൽ ഏർപ്പെട്ടിരിക്കുന്ന ഉദ്യോഗസ്ഥരെ ക്രൂരമായി ആക്രമിക്കുന്നതും അന്വേഷണം തടസ്സപ്പെടുത്താൻ നോക്കുന്നതും രാഷ്ട്രീയ പ്രതിഷേധമല്ലെന്ന് രാജീവ് ചന്ദ്രശേഖർ വ്യക്തമാക്കി. ഇത് രാജ്യത്തെ നിയമവാഴ്ചയ്ക്ക് നേരെയുള്ള പരസ്യമായ കടന്നാക്രമണമാണ്. അക്രമം അഴിച്ചുവിട്ട് കേന്ദ്ര ഏജൻസികളെ ഭയപ്പെടുത്താമെന്ന് സി.പി.എം കരുതേണ്ടെന്നും അദ്ദേഹം കൂട്ടിച്ചേർത്തു.
സംഭവത്തിൽ കോൺഗ്രസ് നയിക്കുന്ന സംസ്ഥാന സർക്കാരിന്റെ മൗനത്തെയും അദ്ദേഹം കടുത്ത ഭാഷയിൽ വിമർശിച്ചു. പതിവുപോലെ, തങ്ങളുടെ രാഷ്ട്രീയ ഇരട്ടയായ സി.പി.എമ്മിനെ സംരക്ഷിക്കാൻ കോൺഗ്രസ് സർക്കാർ മൗനം പാലിക്കുകയാണ്. കോൺഗ്രസും സി.പി.എമ്മും രണ്ടല്ല, ഒന്നാണെന്ന് ഈ നിലപാടിലൂടെ ഒരിക്കൽക്കൂടി തെളിഞ്ഞിരിക്കുകയാണെന്നും അദ്ദേഹം പരിഹസിച്ചു.
മാസപ്പടി കേസിന്റെ സത്യമറിയാൻ കേരളത്തിലെ ജനങ്ങൾക്ക് പൂർണ്ണ അവകാശമുണ്ട്. ഒരു നേതാവോ പാർട്ടിയോ മുൻ മുഖ്യമന്ത്രിയോ ഈ നാട്ടിലെ നിയമത്തിന് അതീതരല്ലെന്ന് സി.പി.എം ഓർക്കണം. ഭീഷണികളിലൂടെയോ കല്ലേറിലൂടെയോ രാഷ്ട്രീയ സമ്മർദ്ദത്തിലൂടെയോ നീതി അട്ടിമറിക്കാൻ അനുവദിക്കില്ലെന്നും, കുറ്റവാളികളെ നിയമത്തിന് മുന്നിൽ കൊണ്ടുവരുമെന്ന് ബി.ജെ.പി/എൻ.ഡി.എ ഉറപ്പാക്കുമെന്നും രാജീവ് ചന്ദ്രശേഖർ വ്യക്തമാക്കി.
