പാരീസ് ഒളിമ്പിക്സ് ഗുസ്തിയില് ഫൈനലിന് മുന്നോടിയായുള്ള ഭാരപരിശോധനയില് പരാജയപ്പെട്ടതിനെത്തുടർന്ന് അയോഗ്യയാക്കപ്പെട്ട ഇന്ത്യന് താരം വിനേഷ് ഫോഗട്ടിനെ ആശുപത്രിയിൽ പ്രവേശിപ്പിച്ചു. നിർജ്ജലീകരണം മൂലമാണ് താരത്തെ ആശുപത്രിയിൽ പ്രവേശിപ്പിച്ചതെന്നാണ് വിവരം.
അതേസമയം നിർദ്ദിഷ്ട ഭാരത്തേക്കാൾ ഭാരംകൂടുതലുള്ള കാര്യം ഇന്നലെ രാത്രി തന്നെ വിനേഷ് ഫോഗട്ടും പരിശീലകരും തിരിച്ചറിഞ്ഞിരുന്നുവെന്ന റിപ്പോർട്ട് പുറത്തു വന്നു. ഇന്നു രാവിലെ ഭാരപരിശോധനയ്ക്കു മുൻപായി നിശ്ചിത ഭാരമായ 50 കിലോഗ്രാമിലേക്ക് എത്താൻ കഴിഞ്ഞ ദിവസം രാത്രി മുഴുവൻ കഠിനാധ്വാനം ചെയ്യുകയായിരുന്നു താരം. ഭക്ഷണം ഉപേക്ഷിച്ചും കഠിനമായ വ്യായാമ മുറകൾ ചെയ്തും ഭാരം കുറയ്ക്കാനായിരുന്നു വിനേഷ് ഫോഗട്ടിന്റെ തീവ്രശ്രമം.
മത്സരത്തിന് 14 മണിക്കൂർ മുൻപ്, അതായത് ഫ്രഞ്ച് സമയം രാവിലെ 7.30നായിരുന്നു ഭാര പരിശോധന നടത്താനുള്ള സമയപരിധി. രാവിലെ 7.30 വരെ എപ്പോൾ വേണമെങ്കിലും ശരീരഭാരം പരിശോധിക്കാമെന്നാണ് ചട്ടമെങ്കിലും, ഏറ്റവുമൊടുവിൽ സമയപരിധി തീരുന്നതിനു തൊട്ടുമുൻപാണ് വിനേഷ് ഫോഗട്ട് ഭാര പരിശോധനയ്ക്ക് എത്തിയത്. ഇലക്ട്രോണിക് വെയിങ് മെഷീൻ ഉപയോഗിച്ചുള്ള പരിശോധനയിൽ സ്ക്രീനിൽ തെളിഞ്ഞത് 50.100 കിലോഗ്രാം ഭാരം. ഇതോടെ അധികൃതർ എതിർപ്പ് ഉന്നയിച്ചു. അയോഗ്യയാക്കേണ്ടി വരുമെന്ന് സൂചിപ്പിക്കുകയും ചെയ്തു. ഇന്ത്യൻ സംഘം അപ്പോൾത്തന്നെ എതിർ വാദമുന്നയിച്ചെങ്കിലും ചെവിക്കൊള്ളാൻ ഒളിംപിക്സ് അധികൃതർ തയാറായില്ലെന്നാണ് വിവരം. ഇതോടെ ഇന്ത്യൻ സംഘം പ്രതിഷേധിച്ചു. പ്രതിഷേധം ശക്തമായതോടെ, കൃത്യനിർവഹണം തടസ്സപ്പെടുത്തുന്നുവെന്ന് ചൂണ്ടിക്കാട്ടി പരിശോധനയ്ക്ക് നിയോഗിക്കപ്പെട്ടിരുന്നവർ പരാതി നൽകി. വിനേഷ് ഫോഗട്ടിനെ അയോഗ്യയാക്കിയ രാജ്യാന്തര ഒളിംപിക് അസോസിയേഷൻ, പുനഃപരിശോധനയ്ക്കുള്ള ഇന്ത്യയുടെ ആവശ്യവും നിരാകരിച്ചു. അതേ സമയം വിനേഷിന്റെ ഭാരം കൂടാൻ ഇടയാക്കിയത് എന്തെന്ന കാര്യത്തിൽ നിലവിൽ വ്യക്തത വന്നിട്ടില്ല.
