ദില്ലി : രണ്ട് ദിവസമായി മഴയ്ക്ക് കുറവുണ്ടെങ്കിലും ദില്ലിയിൽ ദുരിതമൊഴിയുന്നില്ല. യമുന നദിയിലെ ജലനിരപ്പ് 45 വർഷത്തിനുശേഷം ഏറ്റവും ഉയർന്ന നിലയിൽ രേഖപ്പെടുത്തി. 207.55 മീറ്ററാണ് നിലവിലെ ജലനിരപ്പ്. 45 വർഷം മുൻപ് 207.49 മീറ്റർ വരെയാണ് ജലനിരപ്പ് ഉയർന്നത്. ജലനിരപ്പ് ഉയർന്നതോടെ നദീതീരത്തെ വീടുകളും കെട്ടിടങ്ങളും വെള്ളത്തിനടിയിലായി. ദില്ലിയുടെ പലഭാഗത്തും നിരോധനാജ്ഞ പ്രഖ്യാപിച്ചിരിക്കുകയാണ്. സാഹചര്യം വിലയിരുത്താൻ മുഖ്യമന്ത്രി അരവിന്ദ് കേജ്രിവാളിന്റെ അദ്ധ്യക്ഷതയിൽ അടിയന്തര യോഗം വിളിച്ചു.
പ്രളയഭീഷണി നേരിടുന്ന പ്രദേശങ്ങളിലുള്ളവരെ ദുരിതാശ്വാസ ക്യാംപുകളിലേക്കും സാമൂഹിക കേന്ദ്രങ്ങളിലേക്കും മാറ്റും. പ്രളയസാധ്യതാ പ്രദേശങ്ങള് നിരീക്ഷിക്കുന്നതിനായി 16 കണ്ട്രോള് റൂമുകള് ദില്ലി സര്ക്കാര് തുറന്നു. വെള്ളക്കെട്ടുള്പ്പടെയുള്ള പ്രശ്നങ്ങള് ദ്രുതഗതിയില് പരിഹരിക്കുമെന്നും അരവിന്ദ് കേജ്രിവാള് വ്യക്തമാക്കി.

