മുംബൈ: വിരമിക്കൽ സംബന്ധിച്ച വിവാദങ്ങൾക്കിടെ വെസ്റ്റിൻഡീസ് പര്യടനത്തിനുള്ള ഇന്ത്യൻ ടീമിൽ നിന്നും മുൻ നായകൻ മഹേന്ദ്ര സിങ് ധോണി പിന്മാറി. അടുത്ത രണ്ട് മാസം ടെറിട്ടോറിയൽ ആർമിക്കൊപ്പം ചെലവിടാന്‍ വേണ്ടിയാണ് ധോണി വെസ്റ്റിൻഡീസ് പര്യാടനത്തില്‍ നിന്ന് വിട്ടുനില്‍ക്കുന്നത്.ടെറിട്ടോറിയൽ ആർമിയുടെ പാരച്യൂട്ട് റെജിമെന്‍റില്‍ ലെഫ്റ്റനന്‍റ് കേണലിന്‍റെ ഹോണററി പദവി വഹിക്കുകയാണ് ധോണി. പര്യടനത്തിൽ നിന്ന് ഒഴിവാക്കണമെന്ന് ധോണി ബി സി സി ഐയോട് ഔദ്യോഗികമായി ആവശ്യപ്പെട്ടു.വെസ്റ്റിൻഡീസ് പര്യടനത്തിനുള്ള ടീമിനെ പ്രഖ്യാപിക്കാൻ എം എസ്‌ കെ പ്രസാദിന്‍റെ നേതൃത്വത്തിലുള്ള സെലക്ഷൻ പാനൽ ഞായറാഴ്ച യോഗം ചേരാനിരിക്കെയാണ് ധോണിയുടെ പിന്മാറ്റം.
അതേസമയം അന്താരാഷ്ട്ര ക്രിക്കറ്റിൽ നിന്ന് വിരമിക്കാൻ ധോണിക്ക് ഉടൻ പദ്ധതിയില്ലെന്ന് അദ്ദേഹത്തിന്‍റെ ദീർഘകാല സുഹൃത്തും ബിസിനസ്സ് പങ്കാളിയുമായ അരുൺ പാണ്ഡെ പറഞ്ഞു. അദ്ദേഹത്തിന് ഉടനടി വിരമിക്കാനുള്ള പദ്ധതികളൊന്നുമില്ല. അദ്ദേഹത്തെപ്പോലുള്ള ഒരു മികച്ച കളിക്കാരന്‍റെ ഭാവിയെക്കുറിച്ചുള്ള നിരന്തരമായി ഊഹാപോഹങ്ങള്‍ നടത്തുന്നത് നിർഭാഗ്യകരമാണെന്നും അദ്ദേഹം വ്യക്തമാക്കി.
