കോഴിക്കോട്: പ്രമുഖ നാടക, സാംസ്കാരിക പ്രവർത്തകൻ മധു മാഷ് വിടവാങ്ങി(Madhu Mash Passed Away). 73 വയസ്സായിരുന്നു. ദീർഘനാളായി അസുഖ ബാധിതനായി ജില്ലാ സഹകരണ ആശുപത്രിയിലായിരുന്നു അദ്ദേഹം. ഇന്ന് ഉച്ചയ്ക്ക് ഒന്നരയോടെയായിരുന്നു അന്ത്യം.
നൂറു കണക്കിന് വേദികളിൽ അവതരിപ്പിക്കപ്പെട്ട അമ്മ നാടകത്തിന്റെ രചയിതാവും സംവിധായകനുമാണ്. ഇന്ത്യ 1974, പടയണി, സ്പാർട്ടക്കസ്സ്, കറുത്ത വാർത്ത, കലിഗുല, ക്രൈം, സുനന്ദ തുടങ്ങി നിരവധി നാടകങ്ങൾ അദ്ദേഹത്തിന്റേതായുണ്ട്.
സംഘഗാനം, ഷട്ടർ തുടങ്ങിയ മലയാളം സിനിമകളിലും അഭിനയിച്ചു. 1948 ഒക്ടോബർ 12ന് കൊല്ലരുകണ്ടി ചന്തുവിന്റെയും നാരായണിയുടെയും മകനായി അത്താണിക്കലിലാണ് ജനനം. എടക്കാട് ആണ് അദ്ദേഹം താമസിച്ചിരുന്നത്. ഭാര്യ: ഉഷാറാണി. മക്കൾ: വിധുരാജ് , അഭിനയ രാജ്. മരുമക്കൾ: സ്വർണ, സുദർശന എന്നിവരാണ്.