തൃശ്ശൂർ: മൂന്നുകോടി രൂപയുടെ മയക്കുമരുന്നുകളുമായി രണ്ട് യുവാക്കൾ എക്സൈസ് സംഘത്തിന്റെ പിടിയിൽ. തൃശ്ശൂർ കിഴക്കേക്കോട്ടയിൽ അലങ്കാര മത്സ്യക്കട നടത്തിയിരുന്ന മിഥിൻ, കണ്ണൂർ സ്വദേശി ചിഞ്ചു മാത്യു എന്നിവരാണ് പിടിയിലായത്. രണ്ടേ കാൽ കിലോ ഹാഷിഷ് ഓയിലും മറ്റ് മയക്കുമരുന്നുകളും ഇവരിൽ നിന്ന് പിടിച്ചെടുത്തു. ടെലഗ്രാം ആപ്പിലൂടെയാണ് മയക്കുമരുന്ന് കച്ചവടം നടത്തിയിരുന്നത്. ഓൺലൈനായി മരുന്ന് വരുത്തി സോഷ്യൽ മീഡിയയിലൂടെ വിൽപന നടത്തുകയായിരുന്നു ഇവരുടെ പതിവ്.
ഓർഡർ കിട്ടിയാൽ ഞൊടിയിടയിൽ മയക്കുമരുന്ന് ആവശ്യക്കാർക്ക് എത്തിക്കുന്നതിൽ വിദഗ്ധനായിരുന്നു മിഥിൻ. 1250 രൂപയാണ് ഒരു ഗ്രാം ഹാഷിഷ് ഓയിലിന് ഇയാൾ ഈടാക്കിയിരുന്നത്. ആവശ്യക്കാരനെന്ന വ്യാജേനയുള്ള സമീപനത്തിലൂടെയാണ് എക്സൈസ് സംഘം ഇയാളെ വലയിലാക്കിയത്. മിഥിനിൽ നിന്നും മുക്കാൽ കിലോ ഹാഷിഷ് ഓയിലും 1.5 ഗ്രാം എംഡിഎംഎയും 2.60 ഗ്രാം അംഫെറ്റമിനും പിടികൂടി
മിഥിന്റെ ഫോൺ വിവരത്തിന്റെ അടിസ്ഥാനത്തിലാണ് ചിഞ്ചു മാത്യുവിനെ തൃശ്ശൂർ റെയിൽവെ സ്റ്റേഷൻ പരിസരത്ത് നിന്ന് പിടികൂടിയത്. പിടികൂടുമ്പോൾ ചിഞ്ചുവിന്റെ പക്കൽ ഒന്നരക്കിലോ ഹാഷിഷ് ഓയിൽ ഉണ്ടായിരുന്നു. ആന്ധ്രപ്രദേശിൽ നിന്നും കൊറിയറിലൂടെയാണ് ചിഞ്ചു മയക്കുമരുന്ന് എത്തിച്ചിരുന്നത്. ഓർഡർ നൽകുന്നവർക്ക് ട്രെയിനിലെത്തി മരുന്ന് കൈമാറുന്നതാണ് ചിഞ്ചുവിന്റെ പതിവ് ശൈലി.
