ഇടുക്കി: കുമളിയില്‍ നവകേരള സദസിന്‍റെ പ്രചരാണത്തിന് വേണ്ടി സംഘടിപ്പിച്ച കാളവണ്ടി മത്സരയോട്ടത്തിനിടെ അപകടം. കാളവണ്ടി നിയന്ത്രണം തെറ്റി പൊതുജനങ്ങള്‍ക്ക് ഇടയിലേക്ക് പാഞ്ഞുകയറി. ആൾക്കൂട്ടം ഓടിമാറിയതിനാൽ വൻ ദുരന്തം ഒഴിവായി.
തമിഴ്‌നാട്ടില്‍നിന്ന് എത്തിച്ച ആറ് കാളവണ്ടികളാണ് മത്സരത്തില്‍ പങ്കെടുത്തത്. കുമളി ജംഗ്ഷന് സമീപത്തുവച്ച് ഒരു കാളവണ്ടി നിയന്ത്രണം വിട്ട് സമീപത്തുണ്ടായിരുന്ന ജീപ്പില്‍ ഇടിച്ചു. കാളവണ്ടിയുടെ ചക്രങ്ങൾ തകർന്നു. ആള്‍ക്കൂട്ടത്തിനിടയിലേക്ക് വിരണ്ടോടിയ കാളകള്‍ പാഞ്ഞെത്തിയെങ്കിലും ആളുകള്‍ ഓടി മാറിയതിനാല്‍ അപകടം ഒഴിവായി.
സി.പി.എം കുമളി ലോക്കല്‍ കമ്മിറ്റിയുടെ നേതൃത്വത്തിലാണ് നവകേരള സദസിന്‍റെ പ്രചരാണാര്‍ഥം മത്സരം സംഘടിപ്പിച്ചത്. മതിയായ സുരക്ഷാ മുന്‍കരുതലുകള്‍ ഇല്ലാതെയാണ് മത്സരം സംഘടിപ്പിച്ചതെന്ന് ആക്ഷേപമുണ്ട്. വാഹന നിയന്ത്രണം ഏർപ്പെടുത്തിയതിന് ശേഷമാണ് മുമ്പ് ഇവിടെ കാളവണ്ടിയോട്ട മത്സരങ്ങൾ സംഘടിപ്പിച്ചിരുന്നത്.
