ദില്ലി : ഇന്ത്യയുടെ വീര പുത്രന്‍ വ്യോമസേന വിംഗ് കമാന്‍ഡര്‍ അഭിനന്ദന്‍ വര്‍ധമാന് സമൂഹമാധ്യമ അക്കൗണ്ടുകള്‍ ഇല്ലെന്ന് ഇന്ത്യന്‍ വ്യോമസേന. അഭിനന്ദന്‍റെ പേരില്‍ സമൂഹമാധ്യമങ്ങളില്‍ നിരവധി അക്കൗണ്ടുകള്‍ സൃഷ്ടിക്കപ്പെട്ട പശ്ചാത്തലത്തിലാണ് വ്യോമസേന വിശദീകരണക്കുറിപ്പ് പുറത്തിറക്കിയത്.
അഭിനന്ദന്‍റെ പേരില്‍ വിവിധ സമൂഹമാധ്യമങ്ങളിലെ പ്ലാറ്റ്ഫോമുകളില്‍ സൃഷ്ടിക്കപ്പെട്ട അക്കൗണ്ടുകളുടെ വിവരങ്ങളും വ്യോമസേന പരസ്യപ്പെടുത്തി. ഈ അക്കൗണ്ടുകള്‍ പിന്തുടരുന്നതില്‍നിന്ന് ഒഴിഞ്ഞുനില്‍ക്കണമെന്ന് പത്രക്കുറിപ്പില്‍ ആവശ്യപ്പെടുന്നു.
കഴിഞ്ഞ മാസം പാക് അധീന കശ്മീരില്‍ യുദ്ധവിമാനം തകര്‍ന്നു നിലത്തിറങ്ങവെയാണ് അഭിനന്ദന്‍ പാക്കിസ്ഥാന്‍റെ പിടിയിലാകുന്നത്. അതിര്‍ത്തിയില്‍ പാക് വ്യോമസേന നടത്തിയ കടന്നുകയറ്റം ചെറുക്കവെയായിരുന്നു അപകടം. മൂന്നു ദിവസത്തിനുശേഷം വാഗ അതിര്‍ത്തിയില്‍വച്ച്‌ അഭിനന്ദനെ ഇന്ത്യക്കു കൈമാറി.
