സ്വാതന്ത്ര്യ സമര ചരിത്രത്തിലെ അറിയപ്പെടാത്ത വീരനായകൻ, പതിമൂന്നാം വയസ്സിൽ സമരാഗ്നിയിലേക്ക് എടുത്തുചാടിയ മൻമഥ് നാഥ് ഗുപ്തയുടെ ജന്മവാർഷികം

ഇന്ന് മന്മഥ് നാഥ് ഗുപ്ത ജന്മവാർഷിക ദിനം. ബ്രിട്ടീഷ് ഇന്ത്യയിലെ യുണൈറ്റഡ് പ്രവിശ്യയിലെ ബനാറസിൽ 1908 ഫെബ്രുവരി 7 ന് വീരേശ്വര ഗുപ്തയുടെ മകനായിട്ടാണ് മന്മഥ് നാഥ് ഗുപ്ത ജനിച്ചത്.
കേവലം പതിമൂന്നാം വയസ്സിൽ ഭാരത സ്വാതന്ത്ര്യ സമര പ്രസ്ഥാനത്തിലേക്കു കടന്നുവന്ന വ്യക്തിയാണ് അദ്ദേഹം. ഹിന്ദുസ്ഥാൻ റിപ്പബ്ലിക്കൻ അസോസിയേഷൻ പോലുള്ള വിപ്ലവസംഘടനകളിൽ പ്രവർത്തിച്ചിട്ടുള്ള വ്യക്തിയാണദ്ദേഹം.

1925-ലെ കകൊരി തീവണ്ടി കൊള്ളയുമായി ബന്ധപ്പെട്ട് അറസ്റ്റിലാവുകയും പതിനാല് വർഷം ജയിൽ ശിക്ഷ അനുഭവിക്കുകയും ചെയ്തു. 1937-ൽ ജയിൽ മോചിതനായ ശേഷം അദ്ദേഹം ഭാരതത്തിലെ ബ്രിട്ടീഷ് ഭരണത്തിനെതിരെ ലേഖനങ്ങളും പുസ്തകങ്ങളും എഴുതി. 1939-ൽ വീണ്ടും അറസ്റ്റിലായ മന്മഥ് നാഥിനെ 1946-ലാണ് ജയിൽ മേചിതനാക്കിയത്.

ഭാരത സ്വാതന്ത്ര്യ സമരവുമായി ബന്ധപ്പെട്ട് ഹിന്ദി, ഇംഗ്ലീഷ്, ബംഗാളി എന്നീ ഭാഷകളിൽ നിരവധി പുസ്തകങ്ങൾ ഇദ്ദേഹം രചിച്ചിട്ടുണ്ട്. ദേ ലിവ്ഡ് ഡെയ്ഞ്ചറസ്ലി – റെംനിസൻസ് ഓഫ് എ റെവല്യൂഷണറി ആണ് ഇദ്ദേഹത്തിന്റെ ഏറ്റവും പ്രശസ്തമായ കൃതി. ആജ്കൽ എന്ന ഹിന്ദി സാഹിത്യ മാസികയിൽ എഡിറ്ററായും ഇദ്ദേഹം പ്രവർത്തിച്ചിട്ടുണ്ട്. 2000 ഒക്ടോബർ 26 ദീപാവലി ദിനത്തിൽ അദ്ദേഹം അന്തരിച്ചു.