തിരുവനന്തപുരം: ഗവർണർ ആരിഫ് മുഹമ്മദ് ഖാൻ നൽകിയ നിർദ്ദേശം പാലിക്കാതെ കലാമണ്ഡലം വൈസ് ചാൻസിലർ ടി.കെ നാരായണൻ. കലാമണ്ഡലത്തിൽ പിആർഒ തസ്തിക നിർത്തലാക്കുന്നത് സംബന്ധിച്ച് വിവരം നേരിട്ടറിയിക്കാൻ ഗവർണർ നൽകിയ നിർദ്ദേശമാണ് കലാമണ്ഡലം വൈസ് ചാൻസിലർ ടി.കെ നാരായണൻ പാലിക്കാത്തത്.
പിആർഒ കേസിൽ ഹൈക്കോടതിയിൽ ഹർജി നൽകിയിരിക്കുന്ന സാഹചര്യത്തിൽ നേരിട്ട് ഹാജരാകുന്നത് കോടതിയലക്ഷ്യമാകുമെന്ന് കാണിച്ചാണ് വി.സിയായ ടി.കെ നാരായണൻ ഇന്ന് ഹാജരാകാതിരുന്നത്. ഇക്കാര്യം വ്യക്തമാക്കി വി.സി ഗവർണർക്ക് കത്ത് നൽകി.
മുമ്പ് പിആർഒ ആയിരുന്ന ഗോപീകൃഷ്ണനെ സസ്പെൻഡ് ചെയ്തിരുന്നു. സസ്പെൻഷൻ പിൻവലിക്കണമെന്ന് ചാൻസലർ കൂടിയായ ഗവർണർ ആവശ്യപ്പെടുകയും ചെയ്തു. എന്നാൽ ഇതിന് തയ്യാറാകാതിരുന്ന വി.സി കലാമണ്ഡലത്തിലെ പിആർഒ തസ്തിക തന്നെ നിർത്തലാക്കാൻ തീരുമാനിക്കുകയായിരുന്നു. ഇക്കാര്യം അറിയിച്ച് വി.സി സർക്കാരിന് കത്തും നൽകി. തുടർന്നാണ് ഗവർണർ നേരിട്ട് ഹാജരാകാൻ വി.സിയോട് ആവശ്യപ്പെട്ടത്.
