ടോക്കിയോ: കനത്ത മഴയെത്തുടർന്നുണ്ടായ മണ്ണിടിച്ചിലിൽ ജപ്പാനിലെ അട്ടാമി നഗരത്തിൽ 20 പേരെ കാണാതായി. എണ്പതു വീടുകൾ പൂർണമായും മണ്ണിനടിയിലായി. നൂറു പേരെയെങ്കിലും കാണാതായിട്ടുണ്ടാകാമെന്നാണ് സർക്കാരിന്റെ അനൗദ്യോഗിക കണക്കുകൾ. ഇവരെ കണ്ടെത്താൻ ഊർജിത രക്ഷാപ്രവർത്തനം തുടരുകയാണ്.
അതേസമയം സെൻട്രൽ ഷിസൂക്ക പ്രവിശ്യയിൽനിന്ന് 35,500 ആളുകളോട് എത്രയും വേഗം ഒഴിഞ്ഞുപോകാൻ ഫയർ ആൻഡ് ഡിസാസ്റ്റർ മാനേജ്മെന്റ് ഏജൻസി ആവശ്യപ്പെട്ടു. ഇവിടെ ഏറ്റവും ഉയർന്ന “ലെവൽ 5’ മുന്നറിയിപ്പാണു നൽകിയിരിക്കുന്നത്. പ്രവിശ്യയുടെ പല മേഖലകളിലും അപകടഭീഷണി നിലനിൽക്കുന്നുണ്ട്. ജപ്പാനിൽ ഈയാഴ്ച ആദ്യം മുതൽ പെയ്യുന്ന കനത്ത പേമാരി ഇപ്പോഴും തുടരുകയാണെന്നാണു റിപ്പോർട്ടുകൾ. തലസ്ഥാനമായ ടോക്കിയോയിൽനിന്ന് 100 കിലോമീറ്റർ തെക്കുപടിഞ്ഞാറായി സ്ഥിതി ചെയ്യുന്ന കടൽത്തീര റിസോർട്ട് മേഖലയാണു ഷിസൂക പ്രവിശ്യ. വർഷത്തിൽ നിരവധി സുനാമികൾ നേരിടുന്ന ഒരു രാജ്യം കൂടിയാണ് ജപ്പാൻ, അതിനാൽ കനത്ത ജാഗ്രതയിലാണ് രാജ്യം
