പതിനാറ് മണിക്കൂർ തകർത്താടി മഴ; തമിഴ്‌നാട് വെള്ളത്തിനടിയിൽ; കേരളത്തിൽ മലയോര മേഖലയിൽ കനത്ത മഴ; രണ്ടിടത്ത് ഉരുൾപൊട്ടി

തിരുവനന്തപുരം/ ചെന്നൈ: കേരളത്തിലും, തമിഴ്നാട്ടിലും തകർത്ത് പെയ്ത് മഴ (Heavy Rain In Kerala And Tamil Nadu). തമിഴ്നാട്ടിൽ പതിനാറ് മണിക്കൂർ തുടർച്ചയായി പെയ്ത മഴയിൽ പല പ്രദേശങ്ങളും വെള്ളത്തിനിടയിലായി. താഴ്ന്ന പ്രദേശങ്ങളിൽ വീണ്ടും വെള്ളം കയറുകയാണ്. ബംഗാൾ ഉൾക്കടലിൽ രൂപം കൊണ്ട ന്യൂനമർദ്ദം കരയോട് അടുക്കുന്നതാണ് മഴ ശക്തമാകാൻ കാരണം. ഈ സാഹചര്യത്തിൽ 13 ജില്ലയിലെ സ്‌കൂളുകൾക്ക് സർക്കാർ അവധി പ്രഖ്യാപിച്ചു. അതോടോപ്പം വ്യാപക കൃഷിനാശമാണ് ഉണ്ടായിരിക്കുന്നത്. തിരുവാരൂരിൽ 50,000 ഏക്കർ കൃഷി വെള്ളത്തിനടിയിലായെന്ന് കർഷകർ പറഞ്ഞു.

നാഗപ്പട്ടണത്തുണ്ടായ കനത്ത മഴയിൽ 25,000 ഏക്കറോളം ഭൂമിയിലെ കൃഷിയും നശിച്ചു. മഴ ശക്തമായി തുടരുന്ന സാഹചര്യത്തിൽ അണക്കെട്ടുകളിൽ നിന്നും കൂടുതൽ വെള്ളം പുറത്തേയ്‌ക്ക് ഒഴുക്കി തുടങ്ങിയിട്ടുണ്ട്. അതേസമയം മഴക്കെടുതിയിൽ മരണം 12 ആയി ഉയർന്നു. രക്ഷാപ്രവർത്തനങ്ങൾക്കായി എൻഡിആർഎഫിന്റെ 13 ടീമിനെ തമിഴ്‌നാട്ടിലും പുതുച്ചേരിയിലും വിന്യസിച്ചിട്ടുണ്ട്. മോശം കാലാവസ്ഥയെ തുടർന്ന് ചെന്നൈ എയർപോർട്ടിൽ എട്ട് വിമാനങ്ങൾ റദ്ദാക്കി. ചെന്നൈയിൽ ലാൻഡ് ചെയ്യേണ്ട നാല് വിമാനങ്ങളും ഇവിടെ നിന്ന് പുറപ്പെടാനിരുന്ന നാല് വിമാനങ്ങളുമാണ് റദ്ദാക്കിയത്.

അതേസമയം കേരളത്തിലും മലയോര മേഖലകളിൽ കനത്ത മഴയാണ് പെയ്തുകൊണ്ടിരിക്കുന്നത്. അച്ചൻകോവിൽ ആറ്റിലും ജലനിരപ്പ് ഉയർന്നിട്ടുണ്ട്. കനത്തമഴയിൽ കോട്ടയം കണമലയിൽ രണ്ടിടത്ത് ഉരുൾപൊട്ടി. ഇതിൽ രണ്ടു വീടുകൾ തകർന്നു. ഇവിടിടെയുള്ള ആളുകളെ മാറ്റിപാർപ്പിച്ചിരിക്കുകയാണ്. പത്തനംതിട്ടയിലും കനത്ത മഴയാണ്. കോന്നി-കൊക്കത്തോട് ഒരേക്കർ ഭാഗത്ത് വെള്ളം കയറി. വനം മേഖലയിൽ ഉരുൾപൊട്ടിയതായും റിപ്പോർട്ടുകളുണ്ട്.