ന്യൂനപക്ഷങ്ങൾക്ക് നേരെയുള്ള അക്രമം തുടർക്കഥ: പാകിസ്ഥാനിൽ ഹിന്ദു വ്യവസായിയെ അക്രമികൾ വെടിവച്ച് കൊന്നു; പ്രതിഷേധവുമായി ഹിന്ദു സംഘടനകൾ രംഗത്ത്

ഇസ്ലാമാബാദ്: പാകിസ്ഥാനിൽ ന്യൂനപക്ഷങ്ങൾക്ക് നേരെയുള്ള അക്രമം തുടർക്കഥയാകുന്നു. രാജ്യത്ത് ഒരു ഹിന്ദു വ്യവസായിയെ (Hindu Merchant Killed In Pakistan) വെടിവച്ചു കൊന്നിരിക്കുകയാണ് അക്രമികൾ. സിന്ധ് പ്രവിശ്യയിലെ ഗോട്കി ജില്ലയിൽ ദഹാർകിയിലാണ് സംഭവം. സദൻ ലാൽ എന്നയാളെയാണ് വെടിവച്ച് കൊലപ്പെടുത്തിയത്. സംഭവത്തിന് പിന്നാലെ പാകിസ്ഥാനിലെ ഹിന്ദു സംഘടനകൾ റോഡ് ഉപരോധിച്ച് പ്രതിഷേധം നടത്തി. തുടർന്ന് പ്രതികളെ പിടികൂടി എന്നാണ് പോലീസ് പറയുന്നത്.

സദൻ ലാലിന്റെ സ്ഥലത്ത് കോട്ടൺ ഫാക്ടറിയും ഫ്‌ലോർ മില്ലും ഉദ്ഘാടനം ചെയ്യുന്നതിനിടെ അക്രമികൾ എത്തി ഇയാളെ വെടിവച്ച് കൊല്ലുകയായിരുന്നു.ഇയാളുടെ രണ്ടേക്കർ സ്ഥലവുമായി ബന്ധപ്പെട്ട് ഏറെ നാളായി പ്രശ്‌നങ്ങൾ നിലനിൽക്കുകയാണ്. അതിന്റെ പേരിൽ നിരവധി പേർ സദനെ ഭീഷണിപ്പെടുത്തിയിരുന്നു. പാകിസ്ഥാൻ വിട്ട് പോകണമെന്നും ഇല്ലെങ്കിൽ കയ്യും കാലും വെട്ടുമെന്നുമാണ് അക്രമികൾ ഭീഷണി മുഴക്കിയത്.

എന്നാൽ ഇത് വിശീദീകരിച്ചുകൊണ്ട് സദൻ ലാൽ വീഡിയോയും ചെയ്തിരുന്നു. താൻ ഒരിക്കലും തലകുനിക്കില്ല എന്നാണ് ധൈര്യത്തോടെ ഇയാൾ വീഡിയോയിൽ പറഞ്ഞത്. അതേസമയം കടയുടെ ആഘോഷത്തിന്റെ ഭാഗമായി നടത്തുന്ന വെടിവയ്പ്പാണെന്നാണ് ആദ്യം കരുതിയതെന്നും പിന്നീടാണ് സദൻ ലാൽ കൊല്ലപ്പെട്ടെന്ന് മനസിലായത് എന്നും ദൃക്‌സാക്ഷികൾ പറഞ്ഞു.