കൊച്ചി: ദുബായില് നിന്ന് വിദേശ പാഴ്സല് വഴിയുള്ള സ്വര്ണക്കടത്തില് കസ്റ്റംസ് ഉദ്യോഗസ്ഥന് അറസ്റ്റില്.കൊച്ചിന് ഫോറിന് പോസ്റ്റ് ഓഫീസിലെ സൂപ്രണ്ട് അശുതോഷ് ആണ് അറസ്റ്റിലായത്. അറസ്റ്റിലായ സ്വര്ണക്കടത്തിന്റെ സൂത്രധാരന് ഷിഹാബില് നിന്നാണ് കൂട്ടാളിയായും കസ്റ്റംസ് ഉദ്യോഗസ്ഥനുമായ അശുതോഷിനെകുറിച്ച് വിവരങ്ങൾ ലഭിച്ചത്.ഡയറക്ടറേറ്റ് ഓഫ് റവന്യൂ ഇന്റലിജന്സ് ( ഡിആര്ഐ) ആണ് ഇയാളെ പിടികൂടിയത്.
സ്വര്ണക്കടത്തു സംഘത്തിലെ പ്രധാനിയാണ് ഇയാളെന്ന് ഡിആര്ഐ ഉദ്യോഗസ്ഥര് സൂചിപ്പിച്ചു. വിദേശപാഴ്സല് വഴി സംസ്ഥാനത്തേക്കുള്ള സ്വര്ണക്കടത്ത് കസ്റ്റംസ് ഉദ്യോഗസ്ഥരുടെ ഒത്താശയോടെയാണെന്ന് ഡിആര്ഐക്ക് വിവരം ലഭിച്ചിരുന്നു. ദുബായില് നിന്ന് വിദേശപാഴ്സല് വഴി കടത്താന് ശ്രമിച്ച മൂന്നര കോടിയുടെ സ്വര്ണം അടുത്തിടെ പിടികൂടിയിരുന്നു. കോഴിക്കോട് സബ് പോസ്റ്റ് ഓഫീസില് സ്വര്ണം അടങ്ങിയ പാഴ്സല് കൈപ്പറ്റാനെത്തിയ സ്ത്രീ ഉള്പ്പെടെ ആറുപേര് അറസ്റ്റിലാകുകയും ചെയ്തിരുന്നു.
