ഇമ്രാന്‍ഖാന്‍റെ മുസാഫറാബാദ് റാലി പരാജയമെന്ന് പാക് അധീന കശ്മീർ നേതാവ് അംജദ് അയൂബ് മിർസ

മുസാഫറാബാദ്: ജമ്മു കശ്മീർ വിഷയത്തിൽ അന്താരാഷ്ട്ര സമൂഹത്തിന്‍റെ പിന്തുണ നേടാനുള്ള പാകിസ്ഥാൻ പ്രധാനമന്ത്രി ഇമ്രാൻ ഖാന്‍റെ അവസാന ശ്രമവും ദയനീയമായി പരാജയപ്പെട്ടു. കശ്മീർ വിഷയത്തിൽ ജനപിന്തുണ തേടി കഴിഞ്ഞ ദിവസം മുസാഫറാബാദിൽ ഇമ്രാൻ ഖാൻ നടത്തിയ റാലിയിൽ ജനപങ്കാളിത്തം തീരെ കുറവായിരുന്നുവെന്ന് റിപ്പോർട്ടുകൾ.

ജനങ്ങൾ തള്ളിക്കളഞ്ഞ റാലിയിൽ ഒടുവിൽ ഇമ്രാൻ ഖാന്‍റെ മുഖം രക്ഷിക്കാനായി അധികാരികൾ ആളിനെ ഇറക്കുമതി ചെയ്യുകയായിരുന്നു. ആബട്ടാബാദിൽ നിന്നും റാവല്പിണ്ടിയിൽ നിന്നും ട്രക്കുകളിൽ ആളുകളെ കൊണ്ടു വന്ന് റാലിയിൽ തിരുകി കയറ്റിയത് നാണം കെട്ട നടപടിയാണെന്ന് പാക് അധീന കശ്മീർ മനുഷ്യാവകാശ പ്രവർത്തകൻ അംജദ് അയൂബ് മിർസ ആരോപിച്ചു.

പാക് അധിനിവേശ കശ്മീരിൽ പാകിസ്ഥാൻ തുടർച്ചയായി നടത്തുന്ന മനുഷ്യാവകാശ ലംഘനങ്ങളിൽ പ്രതിഷേധിച്ച് മേഖലയിലെ ജനങ്ങൾ റാലി ബഹിഷ്കരിക്കുകയായിരുന്നു. ഇമ്രാൻ ഖാന്‍റെ റാലി ബഹിഷ്കരിച്ചതിലൂടെ പാക് അധീന കശ്മീർ വിഷയം അന്താരാഷ്ട്ര തലത്തിൽ ചർച്ചയാക്കിയ പ്രദേശത്തെ ജനങ്ങളോട് നന്ദി അറിയിക്കുന്നതായും മിർസ പറഞ്ഞു.

‘ഇന്ന് ഇമ്രാൻ ഖാൻ കശ്മീരി ജനതയുടെ പേരിൽ മുതലക്കണ്ണീരൊഴുക്കുകയാണ്. എന്നാൽ ഗിൽഗിത്ത് ബാൾട്ടിസ്ഥാനിലെ ജനങ്ങളുടെ അസ്തിത്വം തന്നെ ഇല്ലായ്മ് ചെയ്തിട്ട് നടത്തുന്ന ഈ പ്രഹസനം ലോകം തിരിച്ചറിയേണ്ടതുണ്ട്.’ അംജദ് അയൂബ് മിർസ കൂട്ടിച്ചേർത്തു.

ജമ്മു കശ്മീർ വിഷയത്തിൽ ദയനീയമായി പരാജയപ്പെട്ടു നിൽക്കുന്ന പാകിസ്ഥാൻ പ്രധാനമന്ത്രി ഇമ്രാൻ ഖാന്‍റെ അവസാന പ്രതീക്ഷയായിരുന്ന മുസഫറാബാദ് റാലിയും ദയനീയമായി പരാജയപ്പെട്ടിരിക്കുകയാണ്. അമേരിക്കയും റഷ്യയുമടക്കമുള്ള ലോകരാജ്യങ്ങളും ഐക്യരാഷ്ട്ര രക്ഷാ സമിതിയും ഐക്യരാഷ്ട്ര മനുഷ്യാവകാശ സമിതിയുമടക്കം ഇന്ത്യയെ പിന്തുണക്കുമ്പോൾ നില തെറ്റിയ അവസ്ഥയിലാണ് നിലവിൽ പാകിസ്ഥാൻ.