അബുദാബി: ടി20 ലോകകപ്പില് ഇന്ത്യ ഇന്ന് അഫ്ഗാനിസ്ഥാനെ നേരിടും. അബുദാബിയില് രാത്രി 7 .30നാണ് മത്സരം. ആദ്യ രണ്ട് കളിയും തോറ്റ ഇന്ത്യക്ക് സെമി പ്രതീക്ഷ നിലനിര്ത്താന് വമ്പന് ജയം അനിവാര്യമാണ്. പാകിസ്താനോട് 10 വിക്കറ്റിനും ന്യൂസീലന്ഡിനോട് എട്ട് വിക്കറ്റിനും തോറ്റ ഇന്ത്യക്ക് ശേഷിക്കുന്ന മൂന്ന് മത്സരങ്ങളില് ജയിച്ചാലും സെമിയില് കടക്കുക ഏറെക്കുറെ പ്രയാസമാണ്.
ടീം സെറ്റാവാത്തതാണ് ഇന്ത്യയുടെ പ്രധാന പ്രശ്നം. അഫ്ഗാനിസ്ഥാന് എതിരെ അശ്വിനെ ഇറക്കുമോ എന്നതാണ് ഇപ്പോള് ഉയരുന്ന പ്രധാന ചോദ്യം. ആദ്യ രണ്ട് കളിയിലും കാര്യമായൊന്നും ചെയ്യാന് കഴിയാതെ പോയ ഹര്ദിക് പാണ്ഡ്യയെ അഫ്ഗാനിസ്ഥാന് എതിരായ പ്ലേയിങ് ഇലവനില് നിന്ന് ഒഴിവാക്കാനും സാധ്യതയുണ്ട്. കരുത്തുറ്റ താരനിരയുള്ള അഫ്ഗാനിസ്ഥാനെ നിസാരരായി കാണാനാവില്ല. ഇന്ത്യ-അഫ്ഗാന് നേര്ക്കുനേര് പോരാട്ടം വാശിയേറിയതാവുമെന്നുറപ്പ്. പാക്കിസ്ഥാനെതിരെ പൊരുതി വീണ അഫ്ഗാന് ഇന്നു ജയിച്ചാല് സെമിഫൈനല് സാധ്യത സജീവമാക്കാം