ദില്ലി: ഹിന്ദിയില്‍ സത്യവാചകം ചൊല്ലിയതിന് കൊടിക്കുന്നില്‍ സുരേഷ് എംപിക്ക് സോണിയാഗാന്ധിയുടെ ശകാരം. സ്വന്തം ഭാഷയില്‍ സത്യപ്രതിജ്ഞ ചെയ്താല്‍ പോരായിരുന്നോ എന്ന് ചോദിച്ച സോണിയാഗാന്ധി രാഷ്ട്രഭാഷയില്‍ സത്യപ്രതിജ്ഞ ചെയ്തതില്‍ അതൃപ്തി രേഖപ്പെടുത്തുകയും ചെയ്തു.
ലോക്‌സഭയില്‍ പ്രധാനമന്ത്രി നരേന്ദ്രമോദി സത്യപ്രതിജ്ഞ ചെയ്തതിന് പിറകെയാണ് പ്രൊടൈം സ്പീക്കറെ സഹായിക്കാന്‍ നിയോഗിച്ച കൊടിക്കുന്നില്‍ സുരേഷ് എംപി സത്യപ്രതിജ്ഞ ചെയ്തത്. രാഷ്ട്രഭാഷയായ ഹിന്ദിയിലായിരുന്നു കൊടിക്കുന്നില്‍ സത്യവാചകം ചൊല്ലിയത്. ഇതിനെ ബിജെപി അംഗങ്ങളടക്കമുള്ളവര്‍ കയ്യടിച്ച് സ്വീകരിച്ചു.
തുടര്‍ന്നാണ് രാഷ്ട്രഭാഷയില്‍ സത്യവാചകം ചൊല്ലിയതിന് സോണിയ ഗാന്ധി കൊടിക്കുന്നില്‍ സുരേഷിനെ ശകാരിച്ചത്. സ്വന്തം ഭാഷയിലോ ഇംഗ്ലീഷിലോ സത്യവാചകം ചൊല്ലാമായിരുന്നില്ലേ എന്നും സോണിയ ചോദിച്ചു. സോണിയയുടെ അതൃപ്തി കണക്കിലെടുത്ത് ഹിന്ദിയില്‍ സത്യവാചകം ചൊല്ലാന്‍ തയ്യാറായി വന്ന രാജ്മോഹന്‍ ഉണ്ണിത്താന്‍, വി കെ ശ്രീകണ്ഠന്‍ തുടങ്ങിയ അംഗങ്ങള്‍ പിന്നീട് മലയാളത്തിലാണ് സത്യവാചകം ചൊല്ലിയത്
