ഇന്ത്യയുടെ ആദ്യ സംയുക്ത സൈനിക മേധാവി ബിപിൻ റാവത്തിന്റെ സ്മരണയിൽ രാജ്യം. 2021 ഡിസംബർ 08 ന് നീലഗിരിക്ക് സമീപമുണ്ടായ ഹെലികോപ്റ്റർ അപകടത്തിലാണ് ബിപിൻ റാവത്ത് വിരമൃത്യു വരിച്ചത്. സുളൂരിലെ എയർഫോഴ്‌സ് വിമാനത്താവളത്തിൽ നിന്നും ബിപിൻ റാവത്തും ഭാര്യയും ഉൾപ്പെടെ 14 പേരെയും വഹിച്ചുകൊണ്ട് പറന്നുയർന്ന വ്യോമസേനയുടെ മിൽ എംഐ17 ഹെലികോപ്റ്റർ നീലഗിരിയിലെ വെല്ലിംഗ്ടണ് സമീപം അപകടത്തിൽപ്പെടുകയായിരുന്നു.
ഉത്തരാഖണ്ഡിലെ പൗരിയിൽ 1958 മാർച്ച് 16-നാണ് ബിപിൻ റാവത്ത് ജനിച്ചത്. പിതാവ് ലക്ഷ്മൺ സിങ് റാവത്ത് കരസേനയിൽ ലഫ്റ്റനന്റ് ജനറൽ ആയിരുന്നു. 2017 ഡിസംബർ 17 നാണ് രാജ്യത്തെ 27-ാമത് കരസേനാ മേധാവിയായി ബിപിൻ റാവത്ത് ചുമതല ഏറ്റെടുത്തത്. ഇന്ത്യയുടെ സംയുക്ത സേനാധിപനായി നിയമിക്കപ്പെടുന്ന ആദ്യത്തെ വ്യക്തിയാണ് ജനറൽ ബിപിൻ റാവത്ത്. കരസേനാ മേധാവി സ്ഥാനത്തു നിന്നും വിരമിക്കാനിരിക്കെയാണ് കേന്ദ്ര മന്ത്രിസഭ അദ്ദേഹത്തെ സംയുക്ത സേനാ മേധാവിയായി നിയമിച്ചത്. മൂന്ന് വർഷത്തേക്കായിരുന്നു നിയമനം. 1954-ലിലെ സൈനിക ചട്ടങ്ങൾ ഭേദഗതി വരുത്തി നിയമനത്തിനുള്ള പ്രായപരിധി 62 ൽ നിന്നും 65 ആക്കി വർദ്ധിപ്പിച്ചാണ് ബിപിൻ റാവത്തിനെ ഈ സ്ഥാനത്ത് നിയമിച്ചത്. 2020 ജനുവരി 1 നായിരുന്നു അദ്ദേഹത്തിന്റെ നിയമനം.
നാൽപ്പത് വർഷത്തെ സൈനിക ജീവിതത്തിൽ ബ്രിഗേഡ് കമാൻഡർ, ജനറൽ ഓഫീസർ കമാൻഡിങ് ഇൻ ചീഫ്, സൗത്തേൺ കമാൻഡ്, മിലിട്ടറി ഓപ്പറേഷൻസ് ഡയറക്ട്രേറ്റിലെ ജനറൽ സ്റ്റാഫ് ഓഫീസ‍‍ര്‍ ഡ്രേഡ്-2, കേണൽ മിലിറ്ററി സെക്രട്ടറി, ജൂനിയ‍ര്‍ കമാൻഡിങ് വിങിലെ സീനിയ‍ര്‍ ഇൻസ്ട്രക്ട‍ര്‍, ഡെപ്യൂട്ടി മിലിറ്ററി സെക്രട്ടറി എന്നീ സ്ഥാനങ്ങൾ ബിപിൻ റാവത്ത് വഹിച്ചിട്ടുണ്ട്. കൂടാതെ ഐക്യരാഷ്ട്ര സമാധാന സേനയിലും കോംഗോയിൽ മൾട്ടി നാഷ്ണൽ ബ്രിഗേഡിന്റെ കമാൻഡറായും ബിപിൻ റാവത്ത് പ്രവ‍ര്‍ത്തിച്ചിട്ടുണ്ട്. കൂടാതെ, ഗൂര്‍ഖ ബ്രിഗേഡിൽ നിന്നുള്ള നാലാമത്തെ ചീഫ് ഓഫ് ദ ആ‍ര്‍മി സ്റ്റാഫ് ആകുന്നതിനു മുമ്പ് വൈസ് ചീഫ് ആയിരുന്നു അദ്ദേഹം.
അതേസമയം, ബിപിൻ റാവത്ത് വടക്കു കിഴക്കൻ മേഖലയിലെ തീവ്രവാദ പ്രവ‍ര്‍ത്തനങ്ങൾ കുറച്ചുകൊണ്ടുവരുന്നതിൽ സുപ്രധാന പങ്കുവഹിച്ചിട്ടുണ്ട്. 2015-ൽ മ്യാൻമറിന്റെ അതി‍ര്‍ത്തി കടന്നു നടത്തിയ ആക്രമണമാണ് അദ്ദേഹത്തിന്റെ കരിയറിലെ സുപ്രധാന നീക്കം. ഈ ആക്രമണത്തിലൂടെ നാഷ്ണലിസ്റ്റ് സോഷ്യലിസ്റ്റ് കൗൺസിൽ ഓഫ് നാഗാലാൻഡ് – ഖാപ്‌ലാങ് വിഭാഗം തീവ്രവാദികൾക്ക് ബിപിൻ റാവത്തിന്റെ നേതൃത്വത്തിൽ ചുട്ട മറുപടി നൽകി. ദിമാപൂ‍ര്‍ ആസ്ഥാനമാക്കിയുള്ള തേ‍ര്‍ഡ് കോര്‍പ്സിൽ നിന്നാണ് ദൗത്യം നിറവേറ്റിയത്. കൂടാതെ, ഇന്ത്യൻ സേന അതിർത്തി കടന്ന് 2016ൽ നടത്തിയ സര്‍ജിക്കൽ സ്ട്രൈക്ക് ആസൂത്രണം ചെയ്തവരിൽ ഒരാളായിരുന്നു അദ്ദേഹം. ദില്ലിയിലെ സൗത്ത് ബ്ലോക്കിൽ നിന്നാണ് അദ്ദേഹം ദൗത്യം നിരീക്ഷിച്ചത്. സേവനകാലത്ത് പരം വിശിഷ്ട് സേവാ മെഡൽ, ഉത്തം യുദ്ധ സേവാ മെഡൽ, അതി വിശിഷ്ട് സേവാ മെഡൽ, വിശിഷ്ട് സേവാ മെഡൽ, യുദ്ധസേവാ മെഡൽ, സേനാ മെഡൽ എന്നീ പുരസ്കാരങ്ങൾ അദ്ദേഹത്തെ തേടിയെത്തിയിട്ടുണ്ട്.
