കൊച്ചി: സാമ്പത്തിക തട്ടിപ്പ് കേസിൽ അറസ്റ്റിലായ കെ സുധാകരന്റെ കൂട്ടാളികളേയും ചോദ്യം ചെയ്യാനൊരുങ്ങി ക്രൈംബ്രാഞ്ച്. കൊച്ചിയിലെ കോണ്ഗ്രസ് നേതാവ് എബിന് എബ്രഹാമിനെ ചോദ്യം ചെയ്യുമെന്നാണ് റിപ്പോർട്ട്. സുധാകരൻ മോൺസണെ കാണാൻ എത്തിയപ്പോഴെല്ലാം എബിൻ കൂടെ ഉണ്ടായിരുന്നുവെന്നാണ് വിവരം. പ്രതികളായ പൊലീസ് ഉദ്യോഗസ്ഥരുടെ ചോദ്യം ചെയ്യലും ഉടനുണ്ടായേക്കും.
അതേസമയം കെ സുധാകരനെ മോണ്സണ് മാവുങ്കല് തട്ടിപ്പ് കേസില് പ്രതിയാക്കി അറസ്റ്റ് ചെയ്തതില് പ്രതിഷേധിച്ച് കോണ്ഗ്രസ് ഇന്ന് കരിദിനം ആചരിക്കും. പ്രതിഷേധ സൂചകമായി കോണ്ഗ്രസ് സംസ്ഥാന വ്യാപകമായി ശക്തമായ പ്രക്ഷോഭ പരിപാടികള് സംഘടിപ്പിക്കുമെന്ന് കെപിസിസി ജനറല് സെക്രട്ടറി ടി.യു.രാധാകൃഷ്ണന് പറഞ്ഞു. ആറ് മണിക്കൂര് നീണ്ട ചോദ്യം ചെയ്യലിന് ഒടുവിലായിരുന്നു കെ സുധാകരനെ പൊലീസ് അറസ്റ്റ് ചെയ്തത്.