തിരുവനന്തപുരം: പ്രിയദര്ശന്-മോഹന്ലാല് കൂട്ടുകെട്ടില് പുറത്തിറങ്ങാനിരിക്കുന്ന ഏറ്റവും പുതിയ ചിത്രമാണ് കുഞ്ഞാലി മരയ്ക്കാര്. നിരവധി പ്രത്യേകതകളുമായാണ് ചിത്രം എത്തുന്നത്. മോഹന്ലാലിന്റെ മകനായ പ്രണവും പ്രിയദര്ശന്റെ മക്കളായ കല്യാണിയും സിദ്ധാര്ത്ഥും ചിത്രത്തിന്റെ ഭാഗമാകുന്നുണ്ട്. കല്യാണിയും പ്രണവും ക്യാമറയ്ക്ക് മുന്നില് എത്തുമ്പോള് സിദ്ധാര്ഥ് ക്യാമറയ്ക്ക് പിന്നില് അസോസിയേറ്റ് ആയാണ് പ്രവര്ത്തിക്കുന്നത്.
ഷൂട്ടിന് ശേഷം അച്ഛന്റെ സിനിമയില് ഇനി അഭിനയിക്കില്ലെന്ന് പറയുകയാണ് കല്യാണി പ്രിയദര്ശന്. ഇന്ത്യന് എക്സ്പ്രസിന് നല്കിയ അഭിമുഖത്തിലാണ് അച്ഛനോടൊപ്പം ജോലി ചെയ്ത അനുഭവത്തെ കുറിച്ച് കല്യാണി മനസ് തുറന്നത്. ” എന്റെ അച്ഛന്റെ കൂടെ വീണ്ടും ജോലി ചെയ്യാന് ഞാന് ആഗ്രഹിക്കുന്നില്ല. ഞാന് ബോധം കെട്ട് വീഴുന്ന അവസ്ഥ വരെ ഉണ്ടായിരുന്നു. സെറ്റിലുള്ളവര്ക്കെല്ലാം എന്റെ ഹൃദയമിടിപ്പ് കേള്ക്കാമായിരുന്നു. മലയാളം എനിക്ക് വളരെ എളുപ്പമുള്ള ഭാഷയാണ്. പക്ഷേ അച്ഛന് അവിടെ മൈക്കും പിടിച്ച് നില്ക്കുന്നതു കൊണ്ട് ഒരു വരി പോലും എനിക്ക് ഓര്മ വന്നിരുന്നില്ല.
എനിക്ക് മനസിലായി ഇത് വളരെ അധികം സമ്മര്ദ്ദം നല്കുന്നുണ്ട്. അച്ഛനും അങ്ങനെ തന്നെയാണ്. എന്റെ ആദ്യത്തെ ഷോട്ടിന് അച്ഛന് പ്രാര്ഥിക്കുമായിരുന്നു. മരക്കാരില് റോള് തരണമെന്ന് അച്ഛനോട് ആവശ്യപ്പെടുകയായിരുന്നു. ആദ്യത്തെ അഞ്ച് സിനിമ ഒരുമിച്ച് ചെയ്യില്ലെന്നായിരുന്നു നേരത്തെ തീരുമാനിച്ചിരുന്നത്. എന്നാല് മരക്കാറില് അതിഥി വേഷത്തിലാണ് എത്തുന്നത്” – കല്യാണി പറയുന്നു. ചിത്രത്തില് തൊണ്ണൂറുകളിലെ കഥാപാത്രമായാണ് കല്യാണി എത്തുന്നത്. മലയാളം, തമിഴ്, ഹിന്ദി, തെലുങ്കു ഭാഷകളിലായാണ് ‘മരക്കാര്’ ഒരുങ്ങുന്നത്.