തിരുവനന്തപുരം: കെ.എസ്.എഫ്.ഇയിലെ വിജിലന്‍സ് റെയ്ഡില്‍ ഐസക്കിനെ തള്ളി സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. മന്ത്രി പരസ്യപ്രസ്താവന ഒഴിവാക്കണമായിരുന്നുവെന്ന് കാനം അഭിപ്രായപ്പെട്ടു. വിജിലന്‍സ് റെയ്ഡ് സ്വകാര്യ സ്ഥാപനങ്ങളെ സഹായിക്കാനാണെന്ന് കരുതുന്നില്ല. ഇത്തരം പരിശോധനകള്‍ മന്ത്രിമാര്‍ അറിയണമെന്നില്ലെന്നും മന്ത്രി പറഞ്ഞത് ചെയര്‍മാനോ എംഡിയോ പറയേണ്ട കാര്യമാണെന്നും കാനം പറഞ്ഞു. വിഷയത്തില്‍ സി.പി.ഐയുടെ ആദ്യ പ്രതികരണമാണിത്.
ധനമന്ത്രിയുടെ പരസ്യ പ്രസ്താവനയ്ക്കെതിരെ സി.പി.എമ്മില്‍ തന്നെ രൂക്ഷ വിമര്‍ശനം ഉയര്‍ന്നിരുന്നു. ജി.സുധാകരന്‍, കടകംപള്ളി സുരേന്ദ്രന്‍, ഇ.പി.ജയരാജന്‍ തുടങ്ങിയ മന്ത്രിമാരെല്ലാം ഐസക്കിന്‍റെ പ്രസ്താവന തള്ളിയിരുന്നു. വിജിലന്‍സ് റെയ്ഡ് അടഞ്ഞ അധ്യായമെന്നും ഇനി ഇക്കാര്യത്തില്‍ ചര്‍ച്ചയുണ്ടാകില്ലെന്നും പാര്‍ട്ടി സെക്രട്ടറിയുടെ ചുമതല വഹിക്കുന്ന എ.വിജയരാഘവന്‍ അഭിപ്രായപ്പെട്ടു. തെരഞ്ഞെടുപ്പ് കഴിഞ്ഞാല്‍ പറയാനുള്ള കാര്യങ്ങള്‍ പാര്‍ട്ടിയില്‍ പറയുമെന്ന് ഇന്നലെ തോമസ് ഐസക് പറഞ്ഞിരുന്നു.
