കൊച്ചി: കരുവന്നൂർ ബാങ്ക് തട്ടിപ്പ് കേസിൽ സിപിഎമ്മിനെ കുരുക്കുന്ന അരവിന്ദാക്ഷന്റെ മൊഴി പുറത്ത്. സിപിഎം നേതാക്കൾ പണം കൈപ്പറ്റിയതായാണ് അരവിന്ദാക്ഷൻ ഇ ഡിക്ക് മൊഴി നൽകിരിക്കുന്നത്. പി സതീഷ് കുമാറിന് എൽഡിഎഫ് കൺവീനർ ഇ പി ജയരാജനുമായി അടുത്ത ബന്ധമാണെന്നാണ് അരവിന്ദാക്ഷന്റെ മൊഴി. ഇ പി ജയരാജനുമായി സതീഷ് കുമാർ നടത്തിയ കൂടിക്കാഴ്ചകൾക്കും സാക്ഷിയായത് അരവിന്ദാക്ഷനാണെന്നും മൊഴിയിൽ പറയുന്നു.
അതേസമയം, പി കെ ബിജുവിന് അഞ്ച് ലക്ഷം രൂപ നൽകിയെന്നും എസി മൊയ്തീൻ പണം കൈപ്പറ്റിയെന്നും അരവിന്ദാക്ഷൻ ഇ ഡിയോട് പറഞ്ഞു. 2016ൽ എസി മൊയ്തീൻ രണ്ട് ലക്ഷം രൂപ കൈപ്പറ്റി. പി കെ ബിജു 2020-ൽ 5 ലക്ഷം രൂപ കൈപ്പറ്റി. സതീഷിന്റെ സഹോദരൻ ശ്രീജിത്ത് വഴിയാണ് പണം കൈപ്പറ്റിയതെന്നും ഇ ഡിയുടെ റിപ്പോർട്ടിൽ പറയുന്നു. കരുവന്നൂർ കേസിൽ ഉന്നതരിലേക്ക് അന്വേഷണം ആരംഭിച്ചെന്ന ഇ ഡിയുടെ പ്രഖ്യാപനത്തിന് പിന്നാലെയാണ് അരവിന്ദാക്ഷന്റെ മൊഴി ഇ ഡി പുറത്തുവിട്ടിരിക്കുന്നത്.
