കോട്ടയം: കെവിന്‍ വധക്കേസില്‍ ഒന്നാം പ്രതി ഉള്‍പ്പടെ അഞ്ച് പേരുടെ ജാമ്യാപേക്ഷ കോട്ടയം പ്രിന്‍സിപ്പള്‍ സെഷന്‍സ് കോടതി തള്ളി. കേസിന്റെ വിചാരണ തീയതി ഏപ്രില്‍ രണ്ടിന് പ്രഖ്യാപിക്കും. കെവിന്‍ കൊലപാതക്കേസില്‍ വിചാരണ ഉടന്‍ തുടങ്ങാനിരിക്കുന്നതിനാല്‍ ജാമ്യം നല്‍കാന്‍ കഴിയില്ലെന്ന് കോടതി വ്യക്തമാക്കി.
ഒന്നാം പ്രതി സാനു, അഞ്ചാം പ്രതിയും സാനുവിന്റെ അച്ഛനുമായ ചാക്കോ എന്നിവര്‍ ഉള്‍പ്പടെ അഞ്ച് പേരാണ് ജാമ്യാപേക്ഷ നല്‍കിയത്. നേരത്തെ ഏറ്റുമാനൂര്‍ കോടതിയും ഹൈക്കോടതിയും ഇവരുടെ ജാമ്യപേക്ഷ തള്ളിയിരുന്നു. തുടര്‍ന്നാണ് കോട്ടയം സെഷന്‍സ് കോടതിയെ സമീപിച്ചത്.
പ്രോസിക്യൂഷന്‍, കുറ്റപത്രത്തില്‍ ചില വസ്തുതാപരമായ തെറ്റുകളുണ്ടെന്നും ഇത് തിരുത്താന്‍ അനുവദിക്കണമെന്നും ആവശ്യപ്പെട്ടു.
എട്ടും പത്തും പതിമൂന്നും പ്രതികള്‍ കെവിനെ ഓടിച്ചു എന്നതിന് പകരം ആറ്, എട്ട്, പത്ത്, പതിമൂന്ന് എന്നാണ് എഴുതിയത്. ഒരിടത്ത് ഒന്നും നാലും പ്രതികള്‍ എന്നതിന് പകരം ഒന്ന് മുതല്‍ നാല് വരെ എന്നായി. ഇത് തിരുത്താന്‍ അനുവദിക്കണമെന്ന പ്രോസിക്യൂഷന്റെ ആവശ്യം കോടതി ഏപ്രില്‍ രണ്ടിന് കേസ് വീണ്ടും പരിഗണിക്കും.
