കൊടും തണുപ്പ്, ശുചിമുറികളില്ല, യുക്രൈനിൽ മലയാളികൾ ദുരിതത്തിലെന്ന് റിപ്പോർട്ട്

കീവ്: യുക്രൈനിയൻ തലസ്ഥാനമായ കീവിൽ മലയാളി വിദ്യാർത്ഥികൾ അടക്കമുള്ള ജനത അനുഭവിക്കുന്നത് കൊടും ദുരിതമെന്ന് റിപ്പോർട്ട്. ഇന്ത്യൻ എംബസിയുടെ മുന്നറിയിപ്പിനെത്തുടർന്ന് പലരും തൊട്ടടുത്തുള്ള ഭൂഗർഭമെട്രോ സ്റ്റേഷനുകളിലേക്കും ബങ്കറുകളിലേക്കും എത്തിയിരുന്നു.

സുരക്ഷിതത്വത്തിനായി ഇവിടേയ്ക്ക് വന്ന പലരും ഭക്ഷണമോ വെള്ളമോ കയ്യിലില്ലാതെ വലയുകയാണ്. ഉപയോഗിക്കാൻ ശുചിമുറിയോ, തണുപ്പിൽ പുതയ്ക്കാൻ ഒരു പുതപ്പോ കയ്യിലില്ലാതെ ജീവനും കയ്യിൽ പിടിച്ച് നിലത്തിരിക്കുകയാണ് ജനങ്ങൾ. പലരുടെയും മൊബൈലുകളിൽ ചാർജ് തീരാറായി, കൃത്യമായ ഒരു വിവരവും ഇന്ത്യൻ എംബസിയിൽ നിന്ന് കിട്ടുന്നുമില്ല, തുടങ്ങിയ റിപ്പോട്ടുകളാണ് ലഭിയ്ക്കുന്നത്.

കോവ എന്ന മെട്രോസ്റ്റേഷനാണ് നിലവിൽ ബങ്കറായി ഉപയോഗിക്കുന്നത്. നൂറോളം മലയാളി വിദ്യാർത്ഥികളും അറുപതോളം മലയാളികളും ഈ ബങ്കറിൽ നിലവിൽ ഉണ്ടെന്നാണ് വിവരം.