ബത്തേരി: മൈസൂരില്‍ നിന്നു പെരിന്തല്‍മണ്ണയിലേക്ക്‌ വരുകയായിരുന്ന കെ.എസ്‌.ആര്‍.ടി.സി ബസില്‍ നിന്നു എക്‌സൈസ്‌ അധികൃതര്‍ കഞ്ചാവ് പിടികൂടി. മുത്തങ്ങ എക്‌സൈസ്‌ ചെക്ക്‌ പോസ്‌റ്റില്‍ നടത്തിയ വാഹന പരിശോധനക്കിടെ ഇന്നലെ രാവിലെയാണ്‌ സംഭവം. ഉടമസ്‌ഥനില്ലാത്ത നിലയിലാണ്‌ കഞ്ചാവ് പൊതി ഉണ്ടായിരുന്നത്‌. ബാഗില്‍ ഭദ്രമായി സൂക്ഷിച്ച നിലയില്‍ 1.100 കിലോഗ്രാം കഞ്ചാവാണ്‌ കണ്ടെടുത്തത്‌.
എക്‌സൈസ്‌ ഇന്‍സ്‌പെക്‌ടര്‍ എ. പ്രജിത്തിന്റെ നേതൃത്വത്തില്‍ പ്രിവന്റീവ്‌ ഓഫീസര്‍മാരായ ബാബു മൃദുല്‍, സുരേഷ്‌ വെങ്ങാലികുന്നേല്‍, പി.ഒ (ജി): എ.സി ചന്ദ്രന്‍, സി.ഇ.ഒ ജോബിഷ്‌ എന്നിവരാണ്‌ പരിശോധന നടത്തിയത്‌.
എന്‍.ഡി.പി.എസ്‌. നിയമങ്ങള്‍ക്ക്‌ വിധേയമായി കേസ്‌ രജിസ്‌റ്റര്‍ ചെയ്‌ത് തൊണ്ടി മുതല്‍ കസ്‌റ്റഡിയിലെടുത്തു നടപടികള്‍ സ്വീകരിച്ചതായി അധികൃതര്‍ അറിയിച്ചു.
