മാനന്തവാടി: കഴിഞ്ഞ ദിവസം നടത്തിയ പണിമുടക്കില് പങ്കെടുക്കാത്തതിനെ തുടർന്ന് ജീവനക്കാരനെ ഒരു വിഭാഗം കെ.എസ്.ആര്.ടി.സി ജിവനക്കാര് മര്ദിച്ചെന്ന് പരാതി. മാനന്തവാടി ഡിപ്പോയിലെ ഡ്രൈവര് കം കണ്ടക്ടര് ആയ കല്ലോടി മാങ്കുഴിക്കാട്ടില് ഷാജിയാണ് മാനന്തവാടി പോലീസില് പരാതി നല്കിയിരിക്കുന്നത്. കഴിഞ്ഞ ദിവസം രാത്രി കല്ലോടി സ്കൂള് ജംഗ്ഷനില് വച്ച് ഒരു സംഘം കല്ല് കൊണ്ടും മറ്റും മര്ദിച്ചെന്നാണ് പരാതി.
ആക്രമണത്തിൽ കണ്ണിന് താഴെയും ചുണ്ടിലും പരിക്കേറ്റ ഷാജി മാനന്തവാടി മെഡിക്കല് കോളേജില് ചികിത്സയിലാണ്. ഷാജി പോലീസില് നല്കിയ പരാതിയുടെ അടിസ്ഥാനത്തില് വിവിധ വകുപ്പുകള് പ്രകാരം മാനന്തവാടി പോലീസ് അക്രമികൾക്കെതിരെ കേസെടുത്തു.
മുന്കൂട്ടി റിസര്വേഷന് ഉണ്ടായിരുന്ന തിരുവനന്തപുരത്തേക്കുള്ള ബസ്സില് യാത്രികര്ക്ക് ബുദ്ധിമുട്ടില്ലാതിരിക്കാന് ഇദ്ദേഹം ഡ്യൂട്ടിയെടുത്തിരുന്നു. ഇതില് പ്രകോപിതരായ സമരാനുകൂലികള് ഷാജിയെ ആദ്യം ഫോണില് ഭീഷണിപ്പെടുത്തുകയും തുടർന്ന് മര്ദ്ദിക്കുകയുമായിരുന്നുവെന്നുമാണ് പരാതിയില് ചൂണ്ടിക്കാട്ടിയിരിക്കുന്നത്. അതേ സമയം ഏത് സംഘടനക്ക് കീഴിലുള്ളവരാണ് മര്ദ്ദിച്ചതെന്ന കാര്യത്തില് ഇതുവരെ വ്യക്തതയില്ല.