തിരുവനന്തപുരം:മുഖ്യമന്ത്രി ഉദ്‌ഘാടനം ചെയ്ത കെഎസ്‌ആര്‍ടിസി സ്വിഫ്റ്റ് സര്‍വീസിന്‍റെ കന്നിയാത്രയ്ക്കിടെ ഉണ്ടായ അപകടത്തില്‍ ഡ്രൈവര്‍മാരെ പിരിച്ചു വിട്ടു. ഡ്രൈവര്‍മാരുടെ ഭാഗത്ത് വീഴ്ചയുണ്ടെന്ന് കണ്ടെത്തിയതിനെ തുടര്‍ന്ന് അവരെ ഒഴിവാക്കാനാണ് തീരുമാനം. അപകടമുണ്ടായതിനു കാരണം കെ-സ്വിഫ്റ്റ് ജീവനക്കാരാണെങ്കില്‍ അവര്‍ക്കെതിരേയും ശക്തമായ നടപടിയുണ്ടാകുമെന്നും മന്ത്രി വ്യക്തമാക്കിയിരുന്നു.
കോഴിക്കോട് ട്രിപ്പ് ബസ് തിരുവനന്തപുരം കല്ലമ്പലത്തിനു സമീപം വെച്ചായിരുന്നു അപകടത്തില്‍പ്പെട്ടത്. ആളപായമില്ല. എന്നാല്‍ ബസിന്‍റെ 35,000 രൂപ വിലയുള്ള സൈഡ് മിറര്‍ ഇളകിപ്പോയി. ഇതിനുപകരം കെഎസ്‌ആര്‍ടിസിയുടെ സൈഡ് മിറര്‍ ഘടിപ്പിച്ചു യാത്ര തുടരുകയായിരുന്നു.
കോഴിക്കോട്-തിരുവനന്തപുരം സര്‍വീസിനിടെ മലപ്പുറം ജില്ലയിലെ ചങ്കുവെട്ടിയില്‍ വച്ചും കെ-സ്വിഫ്റ്റ് ബസ് അപകടത്തില്‍പ്പെട്ടു. മലപ്പുറത്ത് കെ-സ്വിഫ്റ്റ് ബസ് സ്വകാര്യ ബസുമായി കൂട്ടിയിടിച്ചായിരുന്നു അപകടം.
